لانڈھی ایکسپورٹ پروسسنگ فیکٹری زون میں خوفناک آتشزدگی، پانچ منزلہ عمارت منہدم، 7 افراد زخمی 

کراچی: شہر قائد کے علاقے لانڈھی کے ایکسپورٹ پروسیسنگ زون میں واقع کپڑوں کی ایک فیکٹری میں لگنے والی آگ نے ہولناک شکل اختیار کرلی، جس کے نتیجے میں پانچ منزلہ عمارت دھماکے سے منہدم ہو گئی جس کے باعث کم از کم 7 افراد زخمی ہوئے۔

 ریسکیو ذرائع کے مطابق آگ ابتدا میں گارمنٹس فیکٹری کے تہہ خانے میں لگی، جو دیکھتے ہی دیکھتے پوری عمارت میں پھیل گئی۔ آگ نے دیگر قریبی عمارتوں کو بھی لپیٹ میں لے لیا۔

حکام کے مطابق متاثرہ فیکٹری کے اندر وقفے وقفے سے دھماکوں کی آوازیں بھی سنائی دیتی رہیں جبکہ دھوئیں کے بادل شہر کے دور دراز علاقوں سے بھی دکھائی دے رہے تھے۔

فائر بریگیڈ حکام نے آگ کو تیسرے درجےکی قرار دیتے ہوئے کہا ہے کہ آگ پر قابو پانے کے لیے 16 فائر ٹینڈرز اور 2 باوزر استعمال کیے گئے،بالاآخر کئی گھنٹے کی جدوجہد کے بعد آگ کے پھیلاؤ کو روک دیا گیا اور متاثرہ فیکٹری اور اطراف کی دیگر فیکٹریوں کو خالی کرا لیا گیا۔

 دوسری طرف ریسکیو ٹیموں نے فوری کارروائی کرتے ہوئے جھلسے ہوئے مزدوروں کو بحفاظت باہر نکالا اور انہیں ابتدائی طبی امداد فراہم کیں۔ 

گارمنٹس فیکٹری کے مالک اقبال ایوب کا کہنا ہے کہ یہ آگ تہہ خانے سے شروع ہوئی تھی، اور ابتدا میں اسے معمولی سمجھا گیاجو بڑی غلطی ثابت ہوئی۔ 

ان کا مزید کہنا تھا کہ ضلعی حکومت کو بروقت اطلاع دے دی گئی تھی اور اگر آگ کو فوری نہ روکا جاتا تو مزید بڑے نقصان کا اندیشہ تھا۔