امریکا کے ہر دلعزیز جج فرینک کیپریو  88 برس کی عمر میں چل بسے

عالمی شہرت کے حامل اور انسان دوست امریکا کے ہر دلعزیز جج فرینک کیپریو  88 برس کی عمر میں چل بسے۔

روڈ آئی لینڈ کے میونسپل کورٹ چیف جج کو 2 برس سے کینسر کا عارضہ لاحق تھا۔ انتقال سے ایک روز پہلے انہوں نے اسپتال میں بستر مرگ سے اپنے چاہنے والوں سے اپیل کی تھی کہ وہ ان کے لیے دعاکریں۔ ٹریفک قوانین کی خلاف ورزی سے متعلق مقدمات کی سماعت کے دوران عدالت کا ماحول کسی فلم سے کم نہ ہوتا۔

فرینک کیپریو جن مقدمات کی سماعت کرتے تھے وہ سوشل میڈیا پر دکھائی جاتی تھیں اور ان کے فیصلوں کا انداز انتہائی متاثر کن ہوتا تھا۔ سماعت کے دوران جج کیپریو گہرائی میں جاکر یہ جاننے کی کوشش کرتے کہ جرم سرزد کیوں ہوا اور فیصلہ ایسا سناتے جس سے مجرم زندگی میں کبھی دوبارہ اس کام کا تصور بھی نہ کرے۔

Sharing a video from the hospital, retired judge Frank Caprio has asked for prayers as the beloved Rhode Island figure faces a health “setback” in his battle with pancreatic cancer. #JudgeFrankCaprio #US pic.twitter.com/9a6lAwY2Vl

— Al Arabiya English (@AlArabiya_Eng) August 20, 2025

یہی وجہ ہے کہ لوگ ان کے فیصلوں کو جاننا چاہتے اور مقدمات کی سماعت سوشل میڈیا پر ان ممالک میں بھی وائرل ہوتی جہاں امریکی حکومت کو پسند نہیں کیا جاتا۔ سوشل میڈیا پر ان کے لاکھوں فالوروز تھے۔

جج کیپریو کے انتقال پر گورنر ڈین مک کی نے پرچم سرنگوں رکھنے کا اعلان کیا ہے۔

گورنر کا کہنا تھا کہ 35 برس تک کمرہ عدالت میں خدمات انجام دینے والے فرینک کیپریو ایک خزانہ تھے جنہوں نے یہ عملی طور پر ثابت کیا کہ اگر انصاف کو انسانیت سے جوڑ دیا جائے تو کیا کیا چیزیں ممکن ہوسکتی ہیں۔

ایمی ایوارڈ کیلئے نامزد شو Caught in Providence میں برسوں تک ان کی خدمات دکھائی جاتی رہی تھیں۔ جن میں انسان دوستی سے متعلق ان کے فیصلوں کے سبب وہ دنیا کے سب سے اچھے جج کی حیثیت سے شہرت رکھتے تھے۔