خواتین کو با اختیار بنانے کے لیے سندھ حکومت کا مفت الیکٹرک بائیک اسکیم کا آغاز 

کراچی: سندھ حکومت نے خواتین کو بااختیار بنانے اور سفری اخراجات میں کمی کے لیے بڑا قدم اٹھا لیا ہے۔

 ورکرز ویلفیئر بورڈ سندھ نے صنعتی اداروں میں کام کرنے والی خواتین کو 10 ہزار مفت الیکٹرک بائیکس فراہم کرنے کے لیے رجسٹریشن کا عمل شروع کر دیا ہے۔

تفصیلات کے مطابق وزیر محنت شاہد عبدالسلام تھہیم کا کہنا ہے کہ یہ سکیم نہ صرف خواتین کی نقل و حرکت کو آسان بنائے گی بلکہ ان کے اخراجات میں کمی، حفاظت میں بہتری اور ماحولیاتی آلودگی میں کمی کا باعث بھی بنے گی ۔

 انہوں نے مزید کہا کہ خواتین کی ترقی کے بغیر ملک کی ترقی ممکن نہیں، اسکیم کا مقصد خواتین کو محفوظ اور با وقار سفری سہولت دینا ہے۔ 

ترجمان سندھ ورکرز ویلفئیر بورڈ کے مطابق اسکیم کے تحت 20 فیصد بائیکس اقلیتی خواتین کے لیے مخص کی گئی ہیں جبکہ اہلیت کے لیے عمر کی حد 20 سے 45 سال رکھی گئی ہےاور اہل امیدواروں کے انتخاب کے لیے ڈیجیٹل قرعہ اندازی کی جائے گی۔ 

 درخواست گزار کو ڈرائیونگ لائیسنس لینے کے لیے 60 دن کی مہلت دی جائے گی۔ 

اس کے علاوہ درخواست گزار خواتین اپنے کاغذات سندھ ورکرز ویلفئیر بورڈ کی ویب سائٹ (WWBS ) کے ذریعے جمع کروا سکتی ہیں۔ درخواستوں کی تصدیق ای او بی آئی /سیسی اور متعلقہ آجر کے سرٹیفیکیٹ کے ذریعے کی جائے گی۔