سیلابی تباہی: 331 سڑکیں متاثر، 32 پل بہہ گئے، بحالی کے لیے اربوں روپے درکار

خیبرپختونخوا میں حالیہ موسلادھار بارشوں، سیلاب اور لینڈ سلائیڈنگ کے نتیجے میں صوبے کی مواصلاتی ڈھانچے کو شدید نقصان پہنچا ہے۔

محکمہ مواصلات و تعمیرات کی 15 سے 22 اگست تک کی رپورٹ کے مطابق، 331 سڑکیں 336 مختلف مقامات پر متاثر ہوئیں، جن میں 493 کلومیٹر پر پھیلی سڑکیں مکمل یا جزوی طور پر تباہ ہو گئیں۔ اس کے علاوہ 57 سڑکیں اب بھی بند ہیں۔ تاہم، 229 سڑکوں کو جزوی اور 50 سڑکوں کو مکمل طور پر بحال کر لیا گیا ہے۔ سڑکوں کی بحالی پر تقریباً 9 ارب 45 کروڑ روپے خرچ ہونے کا تخمینہ لگایا گیا ہے۔

رپورٹ میں مزید بتایا گیا کہ سیلاب کے دوران 32 پل بہہ گئے ہیں، جن میں سے صرف ایک پل مکمل طور پر جبکہ 22 پل جزوی طور پر بحال ہو چکے ہیں۔ 9 پل ابھی تک بند ہیں اور ان کی مرمت پر ایک ارب 12 کروڑ روپے خرچ ہوں گے۔ سب سے زیادہ نقصان سوات ضلع میں ہوا، جہاں 79 سڑکیں 80 مقامات پر متاثر ہوئیں اور 43 کلومیٹر طویل سڑکیں سیلاب میں بہہ گئیں۔ یہاں تین سڑکیں مکمل طور پر اور 75 سڑکیں جزوی طور پر بحال کی گئیں، تاہم دو سڑکیں ابھی بھی بند ہیں۔

بونیر میں 43 سڑکیں متاثر ہوئیں، جن میں سے 39 بحال کر دی گئی ہیں اور 4 سڑکیں بند ہیں۔ اس بحالی کے لیے ساڑھے 4 ارب روپے خرچ ہوں گے۔ صوابی میں 41 سڑکیں متاثر ہوئیں، جن میں سے 32 ابھی تک بحال نہیں ہو سکیں، اور ان کی مرمت پر 2 ارب 76 کروڑ روپے کی ضرورت ہے۔

سیکرٹری مواصلات و تعمیرات محمد اسرار نے کہا کہ بارشوں اور سیلاب نے بونیر اور صوابی میں خاص طور پر شدید نقصان پہنچایا ہے۔ ان کا کہنا تھا کہ محکمہ خزانہ کو 15 اگست کو فنڈز جاری کرنے کی ہدایت کی گئی تھی، جس کے بعد 16 اگست کو 70 کروڑ روپے جاری کیے گئے، جن میں 40 کروڑ مالاکنڈ، 10 کروڑ ہزارہ ریجن، اور 20 کروڑ پختونخوا ہائی وے اتھارٹی کے لیے مختص کیے گئے۔ سڑکوں کی بحالی کا کام 186 مشینریوں کی مدد سے جاری ہے