خیبر پختونخوا میں بارشوں اور سیلاب کے باعث ہونے والے نقصانات کی رپورٹ جاری

پشاور: خیبر پختونخوا میں حالیہ بارشوں اور سیلاب کے باعث سڑکوں اور پلوں کے انفرا سٹریکچر کو شدید نقصان پہنچا ہے۔ 

تفصیلات کے مطابق محکمہ مواصلات و تعمیرات نے 15 سے 22 اگست تک ہونے والے نقصانات کی تفصیلی رپورٹ جاری کر دی ہے۔ 

رپورٹ کے مطابق صوبے میں سیلاب سے 331 سڑکوں کو 336 مقامات پر نقصان پہنچاجبکہ 493 کلو میٹر پر مشتمل سڑکیں لینڈ سلائیڈنگ اور بارشوں کی نذر ہو گئیں، جن میں سے 57 سڑکیں تاحال بند ہیں۔ 

سڑکوں کی بحالی پر 9 ارب 45 کروڑ روپے لاگت کا تخمینہ لگایا گیا ہے۔ اب تک 229 سڑکیں جزوی طور پر اور 50 مکمل طور پر بحال ہو چکی ہیں۔ 

رپورٹ میں مزید کہا گیا کہ صوبے میں 32 پل مکمل طور پر سیلاب میں بہہ گئے ہیں،ان میں سے ایک پل مکمل اور 22 جزوی طور پر ٹریفک کے لیے کھول دئے گئے ہیں، تاہم 9 پل تاحال بند ہیں، پلوں کی مرمت اور اور بحالی پر 1 ارب 12 کروڑ روپے لاگت آئے گی۔ 

رپورٹ کے مطابق سب سے زیادہ متاثرہ اضلاع میں سوات شامل ہے جہاں 79 سڑکیں 80 مقامات پر متاثر ہوئیں، 43 کلو میٹر پر مشتمل سڑکیں سیلاب میں بہہ گئیں، 3 سڑکیں مکمل اور 75 جزوی طور پر بحال کی گئی ہیں جبکہ 2 سڑکیں بند ہیں۔ سوات میں سڑکو ں کی بحالی پر 45 کروڑ روپے سے زیادہ لاگت آئے گی۔ 

دوسری طرف بونیر میں 43 سڑکیں متاثر ہوئیں، جن میں سے 39 جزوی طور پر بحال ہو چکی ہیں جبکہ 4 سڑکیں مکمل طور پر بند ہیں۔ یہاں سڑکوں کی بحالی پر ساڑھے 4 ارب روپے کا خرچ آئے گا۔ 

اسی طرح صوابی میں 41 سڑکیں ٹوٹ پھوٹ کا شکار ہیں۔ ان میں سے 32 سڑکیں ابھی تک بحال نہیں ہو سکیں۔ صوابی میں سڑکوں کی بحالی پر 2 ارب 76 کروڑ روپے خرچ ہوں گے۔

اس حوالے سے سیکریڑی محکمہ مواصلات و تعمیرات محمد اسرار نے میڈیا سے گفتگو کرتے ہوئے کہا کہ بونیر، صوابی اور دیگر اضلاع میں بارشوں اور سیلاب کے باعث شدید نقصان ہوا ہے۔ 

انہوں نے بتایا کہ 15 اگست کو محکمہ خزانہ نے ڈیڑھ ارب روپے جاری کرنے کی منظوری دی تھی، جس میں سے 70 ارب روپے اگلے ہی دن جاری کیے گئے، ان میں سے 40 کروڑ مالا کنڈ ریجن اور 20 کروڑ پختونخوا ہائی ویزا اتھارٹی کو دئیے گئے۔ 

محمد اسرار کے مطابق 186 چھوٹی بڑی مشینریوں کے ذریعے سڑکوں کی بحالی کا کام شروع کر دیا گیا ہے تا کہ متاثرہ علاقوں میں آمد ورفت جلد بحال کی جا سکے۔