وزیر آباد میں فلڈ ریلیف کیمپ عارضی نکلا، مریم نواز کے دورے کے بعد متاثرین واپس، کیمپ بند

وزیر اعلیٰ پنجاب مریم نواز کے دورہ وزیر آباد کے بعد فلڈ ریلیف کیمپ کو بند کر دیا گیا، متاثرین کھانا کھانے کے بعد واپس چلے گئے اور اسکول کو تالے لگا دیے گئے۔

دورے سے قبل سوہدرہ کے گورنمنٹ بوائز ہائی اسکول میں فلڈ ریلیف کیمپ کے لیے عارضی انتظامات کیے گئے تھے، جہاں خیمے، کرسیاں، گدے، دوائیں اور کھانے کا سامان پہنچایا گیا۔ وزیر اعلیٰ مریم نواز نے کیمپ میں موجود سیلاب متاثرین سے ملاقات کی، جاں بحق افراد کے لواحقین سے اظہار تعزیت کیا اور متاثرہ بچوں کے ساتھ کھانے میں بھی شریک ہوئیں۔

اس موقع پر مریم نواز نے یقین دہانی کروائی کہ سیلاب متاثرین کو تمام ضروری سہولیات فراہم کی جائیں گی۔

تاہم، وزیر اعلیٰ کے دورے کے بعد کیمپ کا سامان واپس منتقل کر دیا گیا، متاثرین بھی واپس روانہ ہو گئے اور کیمپ کو بند کر دیا گیا۔ اسسٹنٹ کمشنر کے مطابق متاثرین نے کھانے کے بعد واپسی کو ترجیح دی، تاہم اگلے روز صبح دوبارہ طبی عملہ اور اسٹاف موجود ہوگا۔

دوسری جانب پنجاب کی سینئر وزیر مریم اورنگزیب کا کہنا ہے کہ متاثرین عموماً دن کے وقت کیمپ میں آتے ہیں، کھانا اور طبی امداد حاصل کرتے ہیں لیکن رات گزارنے کے لیے اپنے رشتے داروں کے گھروں کو ترجیح دیتے ہیں۔