اسلام آباد اور راولپنڈی میں موسلا دھار بارش، مختلف علاقے زیرآب، نالہ لئی کے اطراف ہائی الرٹ جاری

اسلام آباد اور راولپنڈی میں جاری موسلا دھار بارش کے باعث مختلف علاقے زیرآب آگئے ہیں، سڑکیں تالاب کا منظر پیش کر رہی ہیں جبکہ ندی نالوں میں طغیانی کے باعث خطرے کی صورتحال پیدا ہو گئی ہے۔

وفاقی دارالحکومت اسلام آباد کے سیکٹر جی 11 اور جی 8 مرکز میں بارش کا پانی سڑکوں پر جمع ہو گیا، جس کے باعث گاڑیاں پانی میں پھنس گئیں۔ بنی گالہ، سری نگر ہائی وے اور میٹرو بس کا روٹ بھی زیرآب آگیا ہے، جس سے شہریوں کو شدید مشکلات کا سامنا ہے۔

ادھر ملکہ کوہسار مری میں بھی تیز بارش کا سلسلہ جاری ہے۔ محکمہ موسمیات نے آئندہ 24 گھنٹوں کے دوران مزید بارشوں کی پیش گوئی کی ہے، جس سے لینڈ سلائیڈنگ اور سفری دشواریوں کا خدشہ ظاہر کیا جا رہا ہے۔

ترجمان واسا کے مطابق اسلام آباد کے سید پور میں 40 ملی میٹر اور گولڑہ میں 66 ملی میٹر بارش ریکارڈ کی گئی ہے۔ راولپنڈی میں شمس آباد میں 25 ملی میٹر، پیر ودھائی میں 35 ملی میٹر جبکہ نیو کٹاریاں میں 60 ملی میٹر بارش ریکارڈ کی گئی ہے۔

نالہ لئی میں خطرناک صورتحال، ہائی الرٹ جاری
ایم ڈی واسا سلیم اشرف نے بتایا ہے کہ نالہ لئی میں پانی کی سطح مسلسل بلند ہو رہی ہے، جس پر کٹاریاں اور گرد و نواح کے رہائشی علاقوں میں ہائی الرٹ جاری کر دیا گیا ہے۔ خطرے کے پیش نظر سائرن بجا دیے گئے ہیں اور عوام کو محتاط رہنے کی ہدایت کی گئی ہے۔

ضلعی انتظامیہ کے مطابق ریسکیو 1122 کی ٹیمیں نالہ لئی کے اہم مقامات پر تعینات کر دی گئی ہیں۔ واسا کے عملے کو رین ایمرجنسی کے تحت فیلڈ میں بھیج دیا گیا ہے جبکہ ہیوی مشینری بھی متحرک ہے۔

ایم ڈی واسا کے مطابق بارش کے سسٹم کو مسلسل مانیٹر کیا جا رہا ہے اور کسی بھی ہنگامی صورتحال سے نمٹنے کے لیے تمام تر انتظامات مکمل ہیں۔