قازقستان کےوزیر خارجہ و نائب وزیراعظم وفد کے ہمراہ 2 روزہ دورے پر پاکستان پہنچ گئے

اسلام آباد: وسط ایشیائی ملک قازقستان کے نائب وزیراعظم و وزیرخارجہ  مرات نورتلیو وفد کے ہمراہ 2 روزہ دورے پر اسلام آباد پہنچ گئے۔

تفصیلات کے مطابق قازقستان کے نائب وزیراعظم و وزیرخارجہ  مرات نورتلیو، تیرہ رکنی وفد کے ہمراہ 2 روزہ دورے پراسلام آباد پہنچ گئے،جہاں ایڈیشنل سیکریٹری خارجہ علی گیلانی نے ان کا استقبال کیا۔

قازقستان کے نائب وزیراعظم کی پاکستانی وزیر خارجہ اسحاق ڈار سے ملاقات ہوگی جبکہ پاکستان اور قازقستان کے درمیان وفود کی سطح پر مذاکرات ہوں گے۔

خیال رہے کہ گزشتہ روز دفتر خارجہ کی جانب سے بتایا گیا تھا کہ قازقستان کے نائب وزیراعظم و وزیرخارجہ مراد نرتلیو 8 تا 9 ستمبر پاکستان کا سرکاری دورہ کریں گے، یہ اہم دورہ نومبر میں قازقستان کے صدر کے مجوزہ پاکستان کے دورے کی تیاریوں کا پیش خیمہ ہے۔

ترجمان کا مزید کہنا تھا کہ پاکستان دورے کے دوران قازقستان کے نائب وزیراعظم اور وزیر خارجہ ہم منصب اسحاق ڈار کے ساتھ ملاقات کریں گے، جبکہ انکی صدر مملکت آصف زرداری اور وزیراعظم شہباز شریف سے ملاقات بھی متوقع ہے۔

ترجمان دفتر خارجہ کا کہنا ہے کہ ان ملاقاتوں میں تجارت اور سرمایہ کاری، زراعت، تعلیم، ثقافتی اور سیاحتی تبادلے، علاقائی رابطے اور رسائی اور کثیرالجہتی فورم پر باہمی تعاون پر توجہ مرکوز ہوگی۔

ترجمان کے مطابق قازق وزیر خارجہ کا دورہ پاک قازق تعلقات کو مزید مضبوط کرے گا، یہ دورہ عوام کی فلاح کے لیے دو طرفہ تعلقات کو گہرا بنائے گا۔