ایشیا کپ 2025 کی فاتح ٹیم کو کتنی انعامی رقم ملے گی؟ تفصیلات سامنے آ گئیں

دبئی: ایشیا کپ 2025 کی فاتح ٹیم کو کتنی انعامی رقم ملے گی اس حوالے سے تفصیلات سامنے آ گئیں ہیں۔

میڈیا رپورٹس کے مطابق ایشین کرکٹ کونسل(اے سی سی)  کی جانب سے ابھی تک ٹورنامنٹ کی انعامی رقم کا باضابطہ اعلان نہیں کیا گیا تاہم  بھارتی میڈیا کی جانب سے ایونٹ کی انعامی رقم کے حوالے سے تفصیلات سامنے آئی ہیں۔

بھارتی میڈیا کی پورٹس کے مطابق ایشیا کپ 2025 کی فاتح ٹیم کو تقریباً 3 لاکھ امریکی ڈالر (ساڑھے8 کروڑ پاکستانی روپے سے زائد) رقم ملے گی جبکہ رنرز اپ کو تقریباً ڈیڑھ لاکھ امریکی ڈالر ( 4 کروڑ پاکستانی روپے سے زائد)  دیئے جائیں گے۔

بھارتی میڈیا کے مطابق اگر یہ رقم حتمی قرار پاتی تو یہ گزشتہ ایڈیشن کے مقابلے میں اضافہ ہو گا،رپورٹس کے مطابق ایشین کرکٹ کونسل  نے ابھی تک ٹورنامنٹ کی انعامی رقم کا باضابطہ اعلان نہیں کیا ہے۔

خیال رہے کہ ایشیا کپ ٹورنامنٹ  کا آغاز آج 9 ستمبر سے متحدہ عرب امارات میں ہونے جا رہا ہے، شائقین ایونٹ میں سنسنی خیز مقابلے کیلئے پر امید ہیں۔

ایشیا کپ 2025 میں 8 ٹیموں کو 2 گروپس میں تقسیم کیا گیا ہے۔ بھارت ایونٹ میں ٹائٹل کا دفاع کرے گا۔یہ ٹورنامنٹ ٹی ٹوئنٹی فارمیٹ میں کھیلا جائے گا۔

ایشیا کپ کے گروپ اے میں پاکستان، بھارت، اومان اور متحدہ عرب امارات شامل ہیں جبکہ گروپ بی میں سری لنکا، بنگلادیش، افغانستان اور ہانگ کانگ کی ٹیمیں شامل ہیں۔