کراچی میں بارش کا سلسلہ جاری، محکمہ موسمیات کی ایک اور اسپیل کی پیشگوئی

کراچی کے مختلف علاقوں میں بارش کا سلسلہ جاری ہے جبکہ محکمہ موسمیات نے آئندہ ایک دو روز میں بارش کا نیا اسپیل آنے کی پیش گوئی کی گئی ہے۔ 

تفصیلات کے مطابق شہر قائد  کے مختلف علاقوں میں وقفے وقفے سے بارش جاری ہے،جبکہ محکمہ موسمیات کا بتانا ہے کہ مون سون سسٹم کی شدت میں کچھ کمی آئی ہے اور اب یہ سسٹم ڈیپ ڈپریشن سے ڈپریشن میں تبدیل ہوگیا ہے۔

محکمہ موسمیات کے مطابق سسٹم کا مرکز ابھی کراچی کے قریب آنا باقی ہے اور شہرمیں 24 سے 48 گھنٹوں میں  بارش کا نیا اسپیل آنے کی پیش گوئی ہے۔ 

محکمہ موسمیات کا کہنا ہے کہ حیدرآباد میں یہ سسٹم کل سے اب تک 85 ملی میٹر اور ڈیپلو میں 108 ملی میٹر بارش برسا چکا ہے تاہم 11 ستمبر تک یہ سسٹم بلوچستان کے ساحل قریب پہنچ کر اختتام کو پہنچ سکتا ہے۔

دوسری جانب شہر قائد میں شدید بارشوں کے پیش نظر شہر میں اربن فلڈنگ کا خدشہ ظاہر کیا گیا ہے، جبکہ ملیر ندی میں بھی گزشتہ روز سیلابی صورتحال پیدا ہو گئی، جو طویل عرصے سے خشک رہی تھی۔

کراچی میں دوپہر ایک بجے کے بعد ایم اے جناح روڈ، صدر، لائٹ ہاؤس سمیت مختلف علاقوں میں بارش کا سلسلہ ایک بار پھر شروع ہوگیا ہے۔ بعد ازاں گلستان جوہر، گلشن حدید، شاہراہ فیصل، کورنگی، بہادر آباد، گلشن اقبال اور دیگر علاقوں میں بھی بارش کا آغاز ہوگیا۔

محکمہ موسمیات اور ضلعی انتظامیہ نے شہریوں سے اپیل کی ہے کہ وہ غیر ضروری سفر سے گریز کریں، بجلی کے کھمبوں، ننگی تاروں اور گہرے پانی والے مقامات سے دور رہیں۔ شہری کسی بھی ہنگامی صورتحال میں ریسکیو اداروں سے فوری رابطہ کریں۔