میجر عدنان شہید کی نمازِ جنازہ ادا ،وزیراعظم، آرمی چیف ، وزراء سمیت عوام کی کثیر تعداد میں شرکت

راولپنڈی: دہشت گردوں کی فائرنگ سے زخمی اور پھر شہید ہونے والے میجر عدنان اسلم شہید کی نماز جنازہ چکلالہ راولپنڈی میں ادا کر دی گئی۔

پاک فوج کے شعبہ تعلقات عامہ کے (آئی ایس پی آر) کے مطابق میجر عدنان اسلم کمبائنڈ ملٹری ہسپتال میں دوران علاج جام شہادت نوش کر گئے تھے، 31 سالہ میجر عدنان اسلم راولپنڈی کے رہائشی تھے۔

ترجمان کے مطابق میجر عدنان کی نماز جنازہ میں وزیراعظم شہباز شریف، فیلڈ مارشل سید عاصم منیر، وزیر دفاع خواجہ آصف سمیت حاضر سروس فوجی و سل افسروں اور شہید کے لواحقین نے شرکت کی۔

آئی ایس پی آر کے مطابق میجر عدنان اسلم نے 2 ستمبر کو بنوں میں بھارتی پراکسی فتنہ الخوارج کے بزدلانہ حملے کا بہادری سے مقابلہ کیا۔

آئی ایس پی آر کاکہناہے کہ میجر عدنان اسلم شہید نے دشمن کے سامنے بے مثال دلیری اور قیادت کا مظاہرہ کرتے ہوئے اپنے جوانوں کی صفِ اوّل میں رہ کر لڑائی لڑی۔

اس موقع پر وزیرِ اعظم نے شہید کو خراجِ تحسین پیش کرتے ہوئے کہا کہ آج ہم نے وطن کا ایک بہادر سپوت کھو دیا ہے، جس کی قربانی اور جذبہ ہمیشہ قوم کے دلوں میں زندہ رہے گا۔ وہ پاکستان کے بہترین سپوتوں میں سے ایک تھے جن کی استقامت، حب الوطنی اور قربانی کا جذبہ ناقابلِ فراموش ہے۔

 انہوں ے مزید کہا کہ میجر عدنان اسلم کا عزم، وطن سے محبت اور قربانی کا جذبہ پاکستان کی بہترین نمائندگی کرتا ہے، میجر عدنان کی شہادت اس بات کی گواہی ہے کہ پاکستان کی مسلح افواج ہر قسم کی دہشتگردی کو جڑ سے اکھاڑ پھینکنے کے لیے پرعزم ہیں۔

ترجمان پاک فوج کا مزید کہنا ہے کہ شہید کی یہ قربانی اس امر کا ثبوت ہے کہ پاک افواج دہشت گردی کے مکمل خاتمے کے مشن پر ثابت قدم ہیں اور ہر قیمت پر دشمن کے ناپاک عزائم کو ناکام بنایا جائے گا۔

آئی ایس پی آر کا کہنا ہے کہ میجر عدنان اسلم شہید کو ان کے آبائی علاقے میں پورے فوجی اعزاز کے ساتھ سپردِ خاک کیا جائے گا۔