آئی جی پنجاب کاعید الاضحی کے موقع پر شہریوں اور پولیس فورس کے نام اہم پیغام

تفصیلات کے مطابق آئی جی پنجاب پولیس کا کہنا ہے کہ عیدقربان کا تہوار خوشیوں کا پیغام لانے کے ساتھ ساتھ ہمیں ایثار اور قربانی کا سبق دیتا ہے،پنجاب پولیس شہریوں کی عید خوشگوار بنانے کیلئے ہمیشہ کی طرح اس بار بھی عید کے تینوں روز مصروف عمل رہے گی۔ مساجد، امام بارگاہوں، گلیوں اور شاہراہوں پر پولیس فورس شہریوں کی خدمت اور حفاظت کے فرائض سر انجام دے گی۔

ان کا کہنا تھا دہشت گردی سمیت مشکل کی ہر گھڑی اور خطرے کے سامنے پنجاب پولیس کے فرض شناس جوان سینہ سپررہیں گے ،اگر ایثار اور قربانی کی بات کی جائے تو پنجاب پولیس اس کی بڑی مثال ہے۔آئی جی پنجاب قربانی کی کھالیں حکومت کے منظور کردہ اداروں اور انسانیت کی خدمت کے مشن پر گامزن این جی اوز کو دیں۔

ون ویلنگ، ہوائی فائرنگ سمیت دیگر غیر قانونی سرگرمیوں سے والدین اپنے بچوں کو دور رکھیں ،کورونا وباء کی چوتھی لہر کے پیش نظر شہری عید کی خوشیاں مناتے وقت ایس او پیز کا خاص خیال رکھیں ،ویکسین لگوانے کے باوجود حکومتی ہدایات اور ایس او پیز کی پابندی نہایت ضروری ہے ۔

انعام غنی کا مزید کہنا تھا کہ پرانی دشمنیاں بھلا کر اور دلوں کی کدورتوں کو دور کرکے کھلے دل کے ساتھ امن کے پیغام کو عام کریں۔