پنجاب میں 15 ستمبر سے HPV ویکسینیشن مہم کا آغاز، پسماندہ علاقوں میں خصوصی انتظامات

پنجاب میں ہیومن پیپیلوما وائرس (HPV) سے سروائیکل کینسر کی روک تھام کے لیے 15 سے 27 ستمبر تک HPV ویکسینیشن مہم کا آغاز کیا جائے گا۔

یہ بات ڈائریکٹر ای پی آئی پنجاب ڈاکٹر ثمرہ خرم نے گزشتہ روز ایک مقامی ہوٹل میں صحافیوں کے لیے منعقدہ بریفنگ میں کہی۔ انہوں نے بتایا کہ ہر لڑکی کو ویکسین کی فراہمی کو یقینی بنانے کے لیے خاص طور پر پسماندہ علاقوں میں خصوصی اقدامات کیے جا رہے ہیں۔

اس موقع پر جھپیگو کی کنٹری ڈائریکٹر آمنہ خان، انٹرنیشنل پیپیلوما وائرس سوسائٹی کی سفیر ڈاکٹر نورین ظفر، ڈین آئی پی ایچ ڈاکٹر سائرہ افضل، ڈبلیو ایچ او کی نمائندہ انیبہ خالد، اور یونیسیف کے ایمیونائزیشن آفیسر خرم مبین خان بھی موجود تھے۔

ڈاکٹر ثمرہ خرم نے افتتاحی خطاب میں کہا کہ "ایچ پی وی ویکسین کا تعارف بیماریوں کی روک تھام کے لیے حکومت کا ایک اہم اور یادگار قدم ہے۔ یہ مہم ہماری آئندہ نسلوں کی صحت کے تحفظ کا عزم ظاہر کرتی ہے اور پاکستان کے صحت عامہ کے اہداف کو عالمی معیار کے مطابق لانے کی کوشش ہے۔"

ملک گیر HPV ویکسینیشن مہم، جس کا ہدف 9 سے 14 سال کی عمر کی لڑکیاں ہیں، 15 ستمبر کو پنجاب سمیت دیگر صوبوں میں شروع ہو رہی ہے۔

ڈاکٹر ثمرہ خرم نے صحافیوں کو سروائیکل کینسر، HPV وائرس، اور ویکسین کی فراہمی کے حوالے سے جامع معلومات فراہم کیں۔ انہوں نے کہا، "سروائیکل کینسر ایک قابل تدارک بیماری ہے جو ہر سال پاکستان میں ہزاروں خواتین کو متاثر کرتی ہے۔ ہمارا مقصد 9 سے 14 سال کی عمر کے تقریباً 80 لاکھ لڑکیوں کو یہ جان بچانے والی ویکسین فراہم کرنا ہے۔"

بریفنگ کے دوران HPV ویکسین کے بارے میں ایک تعارفی ویڈیو بھی دکھائی گئی اور سوال و جواب کا سیشن ہوا جس میں ماہرین نے تمام خدشات دور کیے اور کمیونٹی میں آگاہی بڑھانے کی اہمیت پر زور دیا۔

جھپیگو کی ڈاکٹر آمنہ خان نے شراکت داری پر اظہار تشکر کرتے ہوئے کہا، "جھپیگو پنجاب حکومت کے ساتھ مل کر اس تاریخی اقدام میں شامل ہونے پر فخر محسوس کرتا ہے۔ ہمارا تعاون اس بات کی مثال ہے کہ کس طرح عوامی اور نجی شعبے کی شراکت داری عوامی صحت میں مثبت تبدیلی لا سکتی ہے۔ ہم ویکسین کی منصفانہ اور موثر فراہمی کے لیے اپنی فنی مہارت فراہم کرنے کے لیے پرعزم ہیں۔"