مستونگ : سیکیورٹی فورسز کے آپریشن میں 4 بھارتی سرپرستی یافتہ دہشت گرد ہلاک

بلوچستان کے ضلع مستونگ میں سیکیورٹی فورسز کے ایک کامیاب آپریشن میں بھارتی حمایت یافتہ چار دہشت گرد ہلاک ہو گئے ہیں، جن کے قبضے سے اسلحہ، گولہ بارود اور دھماکا خیز مواد بھی برآمد کیا گیا ہے۔

انٹر سروسز پبلک ریلیشنز (آئی ایس پی آر) کے مطابق، انٹیلی جنس معلومات کی بنیاد پر مستونگ میں ’فتنۃ الہندوستان‘ نامی بھارتی پراکسی سے تعلق رکھنے والے دہشت گردوں کی موجودگی کی اطلاع ملی، جس کے بعد آپریشن کیا گیا۔ آپریشن کے دوران سیکیورٹی فورسز نے دہشت گردوں کے ٹھکانے کو نشانہ بنایا، اور شدید فائرنگ کے تبادلے میں چار دہشت گرد ہلاک کر دیے گئے۔

پاک فوج کے شعبہ تعلقات عامہ نے بتایا کہ ہلاک دہشت گردوں کے قبضے سے اسلحہ، گولہ بارود اور دھماکا خیز مواد برآمد کیا گیا، جو علاقے میں مختلف دہشت گرد سرگرمیوں میں ملوث تھے۔ کلیئرنس آپریشن جاری ہے تاکہ علاقے سے باقی دہشت گردوں کو بھی ختم کیا جا سکے۔

آئی ایس پی آر نے کہا کہ سیکیورٹی فورسز قوم کے عزم کو دہراتی ہیں کہ دہشت گردوں کو قانون کے کٹہرے میں لایا جائے گا اور بھارت کی سرپرستی میں دہشت گردی کو جڑ سے ختم کرنے کے لیے بھرپور کوششیں جاری ہیں۔

خیال رہے کہ گزشتہ روز بھی خیبر پختونخوا کے شمالی وزیرستان، مہمند اور بنوں میں انٹیلی جنس بنیاد پر کیے گئے آپریشنز میں 19 دہشت گرد ہلاک ہوئے تھے، جن کا تعلق بھی بھارت کی سرپرستی یافتہ تنظیموں سے تھا۔ مہمند کے علاقے گلونو میں 14 دہشت گرد مارے گئے جبکہ شمالی وزیرستان کے دتہ خیل میں چار کو ٹھکانے لگا دیا گیا تھا۔