اللہ کا شکر ہے، پاکستان کی عزت بچی اب ٹیم سے پرفارمنس کی امید ہے ، محسن نقوی

لاہور: پاکستان کرکٹ بورڈ (پی سی بی) کے چیئرمین محسن نقوی نے کہا ہے کہ اللہ کا شکر ہے پاکستان کی عزت برقرار رہی، اور اب توقع ہے کہ قومی ٹیم میدان میں عمدہ کارکردگی دکھائے گی۔

لاہور میں پریس کانفرنس کرتے ہوئے محسن نقوی کا کہنا تھا کہ حالیہ تنازع پر میچ ریفری نے پاکستانی کپتان اور ٹیم مینیجر سے باضابطہ معذرت کی ہے۔ ان کے مطابق، میچ ریفری نے اعتراف کیا کہ "ایسا واقعہ پیش نہیں آنا چاہیے تھا۔"

پی سی بی چیئرمین نے کہا کہ بورڈ نے آئی سی سی سے 14 ستمبر کو پیش آنے والے واقعے کی مکمل انکوائری کی باقاعدہ درخواست کی ہے۔

محسن نقوی نے زور دیا کہ "کرکٹ کو سیاست سے الگ رکھا جانا چاہیے، کھیل کو کھیل ہی رہنے دینا چاہیے۔" ان کا کہنا تھا کہ اس نازک موقع پر وزیراعظم سمیت اعلیٰ حکام کی مکمل حمایت حاصل تھی، جبکہ سابق چیئرمین نجم سیٹھی اور رمیز راجہ سے بھی مشاورت کی گئی۔

اس موقع پر سابق چیئرمین نجم سیٹھی نے بھی کہا کہ پی سی بی کا ہمیشہ یہ مؤقف رہا ہے کہ کھیل کو سیاست سے دور رکھا جائے۔

رمیز راجہ نے واقعے پر ردِعمل دیتے ہوئے کہا کہ "یہ پاکستان کی ایک اخلاقی فتح ہے۔ اب ٹیم کو کارکردگی سے جواب دینا ہوگا۔ کرکٹ کو سیاسی پلیٹ فارم نہیں بنانا چاہیے۔"

رمیز راجہ نے میچ ریفری اینڈی پائی کرافٹ پر تنقید کرتے ہوئے کہا کہ وہ بھارت کے 'فیورٹ' میچ ریفری معلوم ہوتے ہیں۔ ان کے مطابق، پائی کرافٹ بھارت کے تقریباً 90 میچز میں میچ ریفری کے فرائض انجام دے چکے ہیں، جو جانبداری کے تاثر کو مزید تقویت دیتا ہے۔