ٹک ٹاکر ثنا یوسف قتل کیس میں اہم پیش رفت، مرکزی ملزم پر فرد جرم عائد

اسلام آباد: ٹک ٹاکر ثنا یوسف قتل کیس میں اہم پیش رفت سامنے آئی ہے ،عدالت نے گرفتار ملزم عمر حیات پر فرد جرم عائد کردی۔

تفصیلات کے مطابق اسلام آباد کی ایڈیشنل ڈسٹرکٹ اینڈ سیشن عدالت میںٹک ٹاکر ثنا یوسف قتل کیس کی سماعت ہوئی ،جس میں گرفتار ملزم عمر حیات پر فرد جرم عائد کر دی، تاہم ملزم نے صحتِ جرم سے انکار کرتے ہوئے الزامات کو بے بنیاد قرار دے دیا۔

دوران سماعت ایڈیشنل ڈسٹرکٹ اینڈ سیشن جج محمد افضل مجوکا نے ملزم سے استفسار کیا کہ کیا اس نے ثنا یوسف کو قتل کیا ہے؟جس پر ملزم عمر حیات نے جواب دیا کہ اس پر لگائے گئے تمام الزامات جھوٹے ہیں اور اس نے کوئی جرم نہیں کیا۔

عدالت نے ملزم کو یہ بھی بتایا کہ اس پر ثنا یوسف کا موبائل فون چھیننے کا الزام بھی عائد ہے جسے اس نے ماننے سے انکار کر دیا،بعد ازاں عدالت نے کیس کی مزید سماعت  25 ستمبر تک ملتوی کر دی۔ 

یاد رہے کہ ملزم عمر حیات کیخلاف تھانہ سنبل میں قتل کا مقدمہ درج ہے۔ ملزم نے مبینہ طور پر ٹک ٹاکر ثنا یوسف کے گھر میں گھس کر اسے فائرنگ کر کے قتل کردیا تھا۔ 

واضح رہے کہ 13 ستمبر کو عدالت نے فرد جرم عائد کرنے کے لیے آج کی تاریخ مقرر کی تھی اور ملزم کو چالان کی نقول بھی فراہم کی گئی تھیں۔

پولیس کے مطابق اسلام آباد میں مبینہ طور پر 22 سالہ عمر حیات نے دوستی سے انکار پر ٹک ٹاکر ثنا یوسف کو گھر میں گھس کر قتل کیا تھا۔

واقعے کے بعد پولیس نے فوری کارروائی کرتے ہوئے ملزم کو 20 گھنٹے کے اندر فیصل آباد سے گرفتار کیا تھا، پولیس کا دعویٰ ہے کہ گرفتاری کے بعد ملزم نے ثنا یوسف کے قتل کا اعتراف بھی کیا تھا۔