فخر زمان کا متنازع کیچ: پاکستان نے آئی سی سی کو تھرڈ امپائر کی شکایت کردی

لاہور:ایشیا کپ سپر فور مرحلے میں پاکستان اور بھارت ٹاکرے کے دوران پاکستانی اوپنر بلے بازفخر زمان کے کیچ آوٹ کے متنازع فیصلے پرپاکستان کرکٹ بورڈ( پی سی بی ) نے آئی سی سی کوشکایت کر دی۔

ذرائع کے مطابق میچ کے بعد منیجر نوید اکرم چیمہ نے اپنے تحفظات سے میچ ریفری اینڈی پائی کرافٹ کو آگاہ کیا لیکن چونکہ یہ آئی سی سی امپائرز منیجر کا استحقاق ہے اس لیے انہیں بھی اپنے تحفظات سے آگاہ کردیا گیا ہے۔

کیمرے میں واضح دیکھا جاسکتا ہے کہ فخر کے بیٹ سے ٹکرا کر گیند بھارتی وکٹ کیپر کے گلوز میں جانے سے پہلے زمین پر باوئنس ہوئی۔

تاہم بھارتی ٹیم کی جانب سے اپیل کرنے پر گراؤنڈ امپائر نے معاملہ تھرڈ اپمائر کو ریفر کیا تھا، جس نے بھارت کے حق میں فیصلہ دیا تھا۔

جس پر قومی کرکٹ ٹیم کے کپتان سلمان علی آغا نے بھی تھرڈ اپمپائر کے فیصلہ کو ممکنہ طور پر غلط قرار دیتے ہوئے کہا کہ فیصلہ گراؤنڈ امپائرز ہی کرتے ہیں۔

یاد رہے کہ گزشتہ روز امپائر نے بھارت کے خلاف میچ میں فخرزمان کو غلط طور پرآؤٹ قرار دیا تھا,کپتان سلمان علی آغا نے بھارت کے خلاف میچ میں فخر زمان کے کیچ آؤٹ کو  ممکنہ طور  پر غلط قرار  دیا تھا ۔   پاکستانی ٹیم کےکپتان سلمان علی آغا نے پریس کانفرنس کرتے ہوئے کہا تھا کہ فخر زمان کا آؤٹ شاید غلط تھا، ہمیں لگا گیند زمین پر لگی مگر فیصلہ امپائر کا ہی ہوتا ہے۔

پاکستان کی جانب سے غلط کیچ آؤٹ کے خلاف شکایت باضابطہ طور پر آئی سی سی میچ ریفری اینڈی پائی کرافٹ کو کی گئی۔

واضح رہے کہ ریفری اینڈی پائیکرافٹ اس سے قبل بھی پاکستان کے خلاف متعصبانہ رویہ دکھا چکے ہیں جس پر مینیجمنٹ نے ان کو ہٹانے کی تحریک کی تھی۔