صاحبزادہ فرحان اور حارث رؤف کے ایکشن پر بھارت کو مرچیں لگ گئیں، آئی سی سی کو شکایت کر دی

دبئی: بوکھلاہٹ کا شکار بھارتی کرکٹ بورڈ نے آئی سی سی سے  پاکستانی کھلاڑیوں کی بھی شکایت کردی۔

بھارتی میڈیا کے مطابق بی سی سی آئی کی جانب عالمی کرکٹ کونسل (آئی سی سی) کو ای میل لکھ کر شکایت کی ہے،شکایت میں بھارتی بورڈ نے صاحبزادہ فرحان کی جانب سے ففٹی اسکور کرنے پر اپنائے گئے جشن کے انداز پر اعتراض اٹھایا ہے۔

اس کے علاوہ سپر فور مرحلے کے دوران حارث رؤف پر بھی ‘اشتعال انگیز اشارے’ کرنے کا الزام لگایا ہے۔

بھارتی میڈیا رپورٹس کے مطابق بی سی سی آئی کی ای میل میں کہا گیا ہےکہ صاحبزادہ فرحان اور حارث رؤف نے گراؤنڈ میں اشتعال انگیز اشارے کیے، حارث رؤف نے تماشائیوں کے کوہلی کوہلی کی آوازیں لگانے پر جیٹ کریش کے اشارے کیے اور 6 صفر کا نشان بنایا جب کہ صاحبزادہ فرحان نے 50 رنز مکمل ہونے پر گن فائر سیلی بریشن کی۔

اس حوالے سے بھارتی کرکٹ بورڈ کی جانب سے میچ ریفری اینڈی ڈی پائی کرافٹ کو ویڈیو ثبوت بھی فراہم کیے گئے ہیں،بورڈ کا کہنا ہے کہ گراؤ نڈ میں یہ رویہ اسپرٹ آف دی گیم کے خلاف ہے لہٰذا کھلاڑیوں کے خلاف سخت ایکشن ہونا چاہیے۔

خیال رہے کہ بھارت کا یہ اقدام پی سی بی کی جانب سے بھارتی بلے باز سوریا کمار یادو کے خلاف شکایت درج کرانے کے جواب میں اٹھایا گیا ہے،سوریا کمار نے چودہ ستمبر کو ہونے والے میچ میں آپریشن سندور اور پہلگام حملے کا ذکر کر کے کھیل میں سیاست لانے کی کوشش کی تھی۔