چاغی سیکورٹی فورسز کارروائی: فتنہ الہندوستان کے 2 دہشت گرد ہلاک، ایک گرفتار

سکیورٹی فورسز کی کارروائی میں بھارتی پروکسی تنظیم "فتنہ الہندوستان" کے دو دہشت گرد ہلاک اور ایک گرفتار ہوا۔

وزیر اعلیٰ بلوچستان سرفراز بگٹی نے اسلام آباد میں پریس کانفرنس کے دوران گرفتار ملزم جہانزیب کی ویڈیو اور اعترافی بیان میڈیا کے سامنے پیش کیا۔ ان کا کہنا تھا کہ چار دن قبل چاغی میں انٹیلی جنس اطلاعات کی بنیاد پر کارروائی کی گئی، جس میں دہشت گردوں کو نشانہ بنایا گیا — دو مارے گئے اور ایک کو گرفتار کیا گیا۔

وزیر اعلیٰ نے بتایا کہ گرفتار دہشت گرد جہانزیب نے ہتھیار ڈال دیے جبکہ باقی ساتھی آپریشن میں مارے گئے۔ جہانزیب نے ویڈیو بیان میں مختلف کارروائیوں میں ملوث ہونے کا اعتراف کیا۔ انہوں نے کہا کہ یہ گروہ چینی باشندوں کی نقل و حرکت پر نظر رکھتے تھے اور جہانزیب دالبندین میں ہتھیار اور دیگر سازوسامان فراہم کرتا تھا۔ سرفراز بگٹی نے اس کارروائی کو بھارت کی خفیہ ایجنسی را کی سرپرستی والی جنگ قرار دیا۔

وزیر اعلیٰ نے کہا کہ بلوچستان میں امن کے لیے بھرپور اقدامات جاری ہیں اور دہشت گردوں کو کسی بھی صورت میں رعایت نہیں دی جائے گی۔ ان کا کہنا تھا کہ دہشت گرد نہتے شہریوں کو نشانہ بنا رہے ہیں، اس لیے فضائی اور زمینی آپریشنز کو سخت رکھا جائے گا۔ انہوں نے یہ بھی بتایا کہ 4G سروسز بند کرنے کے فیصلے پر تنقید ہوئی مگر یہ دہشت گردوں کی رابطہ کاری روکنے کے لیے ضروری تھا۔ آخر میں انہوں نے کہا کہ کسی کو بھی بلوچستان کا امن خراب کرنے کی اجازت نہیں دی جائے گی اور ریاست مخالف بیانیے کو کامیاب نہیں ہونے دیا جائے گا۔