میٹا کی جانب سے کم عمر صارفین کے لیے فیس بک اور میسنجر میں اہم تبدیلی

میٹا نے فیس بک اور میسنجر پر کم عمر صارفین کے تحفظ کے لیے ایک نیا اقدام اٹھایا ہے، جس سے ممکن ہے کہ بہت سے نوجوان صارفین خوش نہ ہوں۔

اس فیصلے کے تحت، فیس بک اور میسنجر پر بڑی تعداد میں نوجوان صارفین کے اکاؤنٹس کو خودکار طور پر "ٹین اکاؤنٹس" میں منتقل کیا جا رہا ہے۔

کمپنی کے مطابق، اس تبدیلی کا مقصد کم عمر صارفین کو زیادہ محفوظ اور محدود آن لائن تجربہ فراہم کرنا ہے۔ اس اپڈیٹ کے بعد لاکھوں اکاؤنٹس خود بخود پرائیویٹ ہو جائیں گے، تاکہ وہ ناپسندیدہ رابطوں اور غیر موزوں مواد سے محفوظ رہیں۔

میٹا نے بتایا ہے کہ یہ اقدام اس وقت کیا جا رہا ہے جب کروڑوں کم عمر صارفین فیس بک اور میسنجر استعمال کر رہے ہیں، اور انہیں بہتر آن لائن تحفظ کی ضرورت ہے۔

"ٹین اکاؤنٹس" کا آغاز سب سے پہلے ستمبر 2024 میں انسٹاگرام پر کیا گیا، جس کے بعد یہ فیچر امریکا، برطانیہ، کینیڈا اور آسٹریلیا میں فیس بک اور میسنجر صارفین کے لیے بھی متعارف کرایا گیا۔ اب یہ خصوصیت دنیا بھر میں نافذ کی جا رہی ہے۔

یہ اپڈیٹ 13 سے 15 سال کی عمر کے صارفین پر لاگو ہو گی، جن کی نشاندہی مصنوعی ذہانت (AI) کی مدد سے کی جائے گی۔

ان اکاؤنٹس پر والدین کو اپنے بچوں کی ایپ سرگرمیوں پر نظر رکھنے کی سہولت حاصل ہو گی۔ ساتھ ہی کم عمر صارفین کو مخصوص مواد، سرچز اور ایکسپلور فیچرز تک محدود رسائی دی جائے گی۔

یہ تبدیلی ایسے وقت میں آ رہی ہے جب میٹا کو عالمی سطح پر کم عمر صارفین کے لیے ناکافی حفاظتی اقدامات کے باعث تنقید کا سامنا ہے۔