’یہ دل آپ کا ہوا‘ کے بعد فلمیں انڈسٹری کے زوال کا باعث بنیں: معمر رانا

معروف پاکستانی فلمی اداکار معمر رانا نے ایک حالیہ انٹرویو میں انکشاف کیا کہ 2002 کی سپر ہٹ فلم "یہ دل آپ کا ہوا" کے بعد بننے والی فلمیں ہی دراصل پاکستانی فلم انڈسٹری کے زوال کا سبب بنیں۔

ان کا کہنا تھا کہ اس فلم کی پروڈکشن اور کامیابی نے فلم سازوں کو واضح پیغام دیا کہ معیاری سنیما کیسے بنایا جاتا ہے، مگر افسوس کہ اس کے بعد آنے والی فلموں میں نہ کہانی کا تنوع رہا اور نہ کرداروں میں کوئی جدت۔ انہوں نے بتایا کہ بعد کے برسوں میں انہیں اور اداکار شان کو بار بار ایک جیسے کرداروں میں ڈالا گیا، جن میں لاچا، کرتا، غنڈے، اور ایک ہیروئن کا محدود فارمولہ بار بار دہرایا گیا، جس سے ناظرین بھی اکتا گئے۔

معمر رانا نے انکشاف کیا کہ فلمی کیریئر کا آغاز محسن حسن خان کی پیشکش پر کیا، جب وہ جم میں ورزش کر رہے تھے۔ انہوں نے بتایا کہ والد کی اجازت کے بعد فلم انڈسٹری کا رخ کیا اور 1997 کی فلم "دیوانے تیرے پیار کے" کے بعد اداکاری میں دلچسپی پیدا ہوئی۔ بالی وڈ فلم "دوبارہ" میں اپنے مختصر کردار کے حوالے سے بھی انہوں نے بتایا کہ انہیں پہلے ہی اس کی تفصیلات بتا دی گئی تھیں اور یہ کردار دراصل سنجے دت کے لیے تھا۔

معمر رانا کا ماننا ہے کہ اگر "یہ دل آپ کا ہوا" جیسی فلموں کے معیار کو برقرار رکھا جاتا تو لالی وُڈ کا زوال نہ آتا۔