Advertisement
تجارت

آئی ایم ایف نے پاکستان سے منی لانڈرنگ اقدامات پر رپورٹ طلب کرلی

حکام آئی ایم ایف کو نیشنل فسکل پیکٹ پر عمل درآمد میں پیشرفت، ترقیاتی منصوبوں میں شفافیت بڑھانے کے اقدامات، اور کیپٹل مارکیٹ کی بہتری کے لیے جاری اصلاحات سے بھی آگاہ کریں گے

GNN Web Desk
شائع شدہ ایک سال قبل پر ستمبر 29 2025، 8:44 شام
ویب ڈیسک کے ذریعے
آئی ایم ایف نے پاکستان سے منی لانڈرنگ اقدامات پر رپورٹ طلب کرلی

بین الاقوامی مالیاتی فنڈ (آئی ایم ایف) نے حکومت پاکستان سے انسداد منی لانڈرنگ اور کرپشن سے متعلق اقدامات کی تفصیلی رپورٹ طلب کر لی ہے۔ یہ مطالبہ پاکستان اور آئی ایم ایف کے درمیان جاری 7 ارب ڈالر کے قرض پروگرام کے تحت ایک ارب ڈالر کی اگلی قسط کے لیے ہونے والے مذاکرات کے دوران سامنے آیا۔

ذرائع کے مطابق آئی ایم ایف کے جائزہ مشن نے وزارت خزانہ میں وزیر خزانہ محمد اورنگزیب کی سربراہی میں پاکستان کی معاشی ٹیم سے اہم ملاقات کی، جس میں قرض پروگرام کی دوسری اقتصادی جائزہ رپورٹ پر گفتگو ہوئی۔

مذاکرات میں ملکی معیشت کی حالیہ کارکردگی، محصولات میں اضافہ، اخراجات پر کنٹرول اور اصلاحاتی پیشرفت جیسے امور زیرِ غور آئے۔ اس کے علاوہ آئی ایم ایف نے پاکستان سے گورننس اینڈ کرپشن رسک اسسمنٹ سے متعلق بھی تازہ پیشرفت رپورٹ طلب کی ہے۔

ذرائع کے مطابق، آئی ایم ایف وفد کو کرپشن کی روک تھام سے متعلق اقدامات پر تفصیلی بریفنگ دی جائے گی۔ اس میں گریڈ 17 سے 22 تک کے افسران کے اثاثوں کی ڈکلیئریشن سے متعلق قانون سازی، اور صوبائی افسران کے مالی گوشواروں تک رسائی جیسے نکات شامل ہوں گے۔

علاوہ ازیں، صوبائی سطح پر انسداد منی لانڈرنگ ایجنسیز کے قیام سے متعلق اقدامات پر بھی تبادلہ خیال ہوگا۔

شفاف ترقیاتی منصوبے اور مالیاتی اصلاحات پر بھی تبادلہ خیال

حکام آئی ایم ایف کو نیشنل فسکل پیکٹ پر عمل درآمد میں پیشرفت، ترقیاتی منصوبوں میں شفافیت بڑھانے کے اقدامات، اور کیپٹل مارکیٹ کی بہتری کے لیے جاری اصلاحات سے بھی آگاہ کریں گے۔

Advertisement
رجحانات
Advertisement