آزاد کشمیر قانون سازاسمبلی کی 45نشستوں کیلئے انتخابات کل ہونگے

تفصیلات کے مطابق آزاد کشمیر قانون سازاسمبلی کامعرکہ کون جیتے گا اس کا فیصلہ کل بروزاتوار  25 جولائی کو ہوگا ، انتخابی مہم کا وقت  کل رات بارہ بجے ختم ہوگیا جبکہ آج سے پولنگ بیگز کی تقسیم شروع کی جائے گی۔

آزادکشمیر کے 33 حلقوں میں  602 امیدوار اپنی قسمت آزمائی کریں گے جبکہ  ا ن 33 حلقوں میں 12بڑے مقابلے متوقع ہیں۔ سابق وزرائے اعظم، سیاسی جماعتوں کے سربراہان اور وزارت عظمیٰ کی دوڑ میں شامل امیدواروں کے درمیان  سخت مقابلوں کا امکان ہے۔ پیپلزپارٹی، پی ٹی آئی اور مسلم لیگ نواز کے درمیان کا نٹے کا مقابلہ  متوقع ہے  جبکہ مرکز میں تحریک انصاف  کی حکومت کی وجہ سے ان کے امیدوراروں کو دیگر جماعتوں کے امیدواروں پر برتری حاصل ہے ۔

25 جولائی کو ہونے والے عام انتخابات میں 32 لاکھ 20 ہزار 793 ووٹرز اپنا حق رائے دہی استعمال کریں گے جبکہ پاکستان میں بسنے والے 4 لاکھ 5 ہزار 253 کشمیری بھی ووٹ کا حق استعمال کر سکیں گے۔

پولنگ کے لیے 40 ہزار پولیس اہلکار الیکشن ڈیوٹی انجام دینگے۔ اس کے علاوہ چھ سے سات ہزار پاک فوج کےجوان بھی امن و امان کو یقینی بنانے کے لئے تعینات کئے گئے ہیں۔ الیکشن کمیشن کی جانب سے انتخابی عمل کے لئے 45 حلقوں میں مردوں کے 1398 خواتین کے 1353 اور مشترک 1992 سمیت کل 6139 پولنگ اسٹیشن قائم کئے جائیں گے۔ آزاد کشمیر میں انتخابی عمل کو شفاف بنانے کے لئے پریزائڈنگ آفیسرز سمیت 250 افسران کو مجسٹریٹ کے برابر اختیارات دیئے جائیں گے۔

دوسری جانب آزاد کشمیر انتخابات میں لاہور کی دو نشستوں پر پولنگ اسٹیشنز پر سامان کی ترسیل آج ہوگی ، پولنگ اسٹیشنز پر سامان سکیورٹی اور آر آوز کی نگرانی میں  پہنچایاجائے گا ۔لاہور میں 25 پولنگ اسٹیشنز قائم کردیے  گئے ہیں،آزاد کشمیر کے انتخابات میں لاہور سے 9 ہزار ایک سو 94 ووٹرز رائے حق دہی استعمال کریں گے۔