آئی سی سی ویمنز ورلڈکپ: جنوبی افریقی بلے باز نے نیا ورلڈ ریکارڈ قائم کر دیا

اندور:آئی سی سی ویمنز ورلڈکپ میں جنوبی افریقی بیٹر تزمین برٹز  نے نیا ورلڈ ریکارڈ قائم کر دیا۔

تفصیلات کے مطابق پیر کو آئی سی سی ویمنز ورلڈ کپ میں جنوبی افریقا نے نیوزی لینڈ کو 6 وکٹوں سے شکست دے دی۔

اندور میں کھیلے گئے میچ میں پہلے نیوزی لینڈ نے بیٹنگ کی جو 48ویں اوور میں 231رنز بناکر آؤٹ ہوگئی، کیویز کی جانب سے سوفی ڈیوائن نے 9 چوکوں کی مددسے 85رنز کی اننگز کھیلی، بروک ہالیدے نے 45 رنز بنائے۔

جواب میں جنوبی افریقی ویمنز ٹیم نے ہدف تزمین برٹز اور سونے لوس کی شاندار بیٹنگ کی بدولت 41 ویں اوور میں 4  وکٹ کے نقصان پر حاصل کرلیا۔

جنوبی افریقی بیٹر تزمین نے 15 چوکوں اور ایک چھکے کی مدد سے 101 رنز کی اننگز کھیلی، سونے لوس 83 رنز پر ناٹ آؤٹ رہیں۔

اس سنچری کی بدولت جنوبی افریقا کی تزمین برٹز نے نیا ورلڈ ریکارڈ بھی قائم کر دیا، وہ ویمنز کرکٹ میں ایک کلینڈر ائیر میں سب سے زیادہ ون ڈے سنچریاں بنانے والی  پلیئر بن گئیں۔

خیال رہے کہ اس سے قبل ون ڈے انٹرنیشنل میں ایک کلینڈر ائیر میں سب سے زیادہ سنچریوں کا ریکارڈ بھارت کی سمرتی مندھانا کے پاس تھا جنہوں نے  2024 اور پھر رواں سال 4  سنچریاں اسکور کیں۔