رواں سال کا پہلا سُپر مون آج  نظر آئے گا جو پاکستان میں بھی دیکھا جائے گا

رواں سال کا پہلا سُپر مون آج  نظر آئے گا۔

ترجمان اسپارکو کے مطابق سپر مون کے دوران چاند زمین سے تقریباً 2 لاکھ 24ہزار میل کے فاصلے پر ہوگا جو ایک عام مکمل چاند سے 6.6 فیصد بڑا اور 13 فیصد زیادہ روشن ہوگا۔

سپر مون کا نظارہ پاکستان میں بھی کیا جاسکے گا۔ سپر مون سورج غروب ہونے کے فوراً بعد مشرق سے طلوع ہوگا اور طلوع آفتاب سے پہلے مغرب میں غروب ہو جائے گا۔

سپارکو کے مطابق رواں سال مزید 2 سپر مونز نظر آئیں گے۔ سال کا سب سے روشن سُپر مون 5 نومبر 2025 کو متوقع ہے جبکہ رواں سال کا تیسرا سُپر مون 5 دسمبر کو نظر آئے گا۔

ماہرین فلکیات کے مطابق سپر مون اُس وقت ظاہر ہوتا ہے جب چاند اپنی مدار میں گھومتے ہوئے زمین کے قریب ترین فاصلے پر ہوتا ہے، اس وجہ سے چاند معمول کے مقابلے نمایاں طور پر بڑا اور روشن دکھائی دیتا ہے یہی وجہ ہے کہ اسے سُپر مون کہا جاتا ہے۔