امیر بالاج قتل کیس کا مرکزی ملزم خواجہ تعریف عرف طیفی بٹ مبینہ پولیس مقابلے میں جاں بحق

رحیم یارخان میں گزشتہ رات ہونے والے مبینہ پولیس مقابلے میں لاہور کے معروف امیر بالاج قتل کیس کا مرکزی ملزم خواجہ تعریف عرف طیفی بٹ مارا گیا۔ طیفی بٹ کو گزشتہ روز ہی دبئی سے گرفتار کرکے پاکستان منتقل کیا گیا تھا۔

پولیس حکام  کے مطابق طیفی بٹ اپنے ہی ساتھیوں کی فائرنگ سے مارا گیا،ذرائع کا کہنا ہے کہ طیفی بٹ کو تفتیش کے لیے لاہور منتقل کیا جا رہا تھا۔

پولیس ذرائع کے مطابق یہ مقابلہ اُس وقت ہوا جب دورانِ منتقلی ملزم کے ساتھیوں نے پولیس وین پر حملہ کیا تاکہ طیفی بٹ کو چھڑایا جا سکے۔ پولیس کی جانب سے جوابی فائرنگ کی گئی اور اسی دوران طیفی بٹ اپنے ہی ساتھیوں کی فائرنگ کی زد میں آکر مارا گیا،واقعے کے بعد پولیس نے علاقے کو گھیرے میں لے کر سرچ آپریشن شروع کر دیا جبکہ طیفی بٹ کی لاش کو مردہ خانے منتقل کر دیا گیا ہے۔

پولیس کی بھاری نفری موقع پر موجود ہے جبکہ ملزمان کی تلاش کے لیے چھاپے مارے جا رہے ہیں، جبکہ فائرنگ کے تبادلے میں پولیس کانسٹیبل نور حسن بھی زخمی ہوگیا۔

خیال رہے کہ امیر بالاج قتل کیس کے مرکزی ملزم طیفی بٹ کو انٹر پول کے ذریعے گرفتار کر کے دبئی سے لاہور لایا گیا تھا جس پر قتل کے متعدد الزامات تھے۔

پولیس حکام کے مطابق ملزم خواجہ تعریف گلشن عرف طیفی بٹ کو دبئی کی عدالت میں پیش کیا گیا تھا جہاں عدالت نے طیفی بٹ سے پاکستان جانے سے متعلق سوال کیا، اس پر ملزم نے پاکستان جانے اور مقدمات کا سامنا کرنے کا کہا تھا۔

ذرائع نے بتایا کہ ملزم کی رضا مندی پر دبئی کی عدالت نے طیفی بٹ کو لاہور پولیس کے حوالے کردیا گیا تھا، جہاں ملزم کا تفتیشی عمل مکمل کرنے کے لیے رحیم یارخان منتقل کیا جا رہا تھا۔

واضح رہے کہ گزشتہ سال 19 فروری کو لاہور میں ٹھوکر نیاز بیگ کے قریب نجی سوسائٹی میں شادی کی تقریب کے دوران حملہ آوروں نے فائرنگ کر کے ٹیپو ٹرکاں والا کے بیٹے امیر بالاج ٹیپو کو قتل کردیا تھا۔