غزہ سیزفائر معاہدے کے تحت اسرائیلی افواج کا انخلا، فلسطینی شہری واپسی کے سفر پر روانہ

غزہ: جنگ بندی معاہدے کے ابتدائی مرحلے کی منظوری کے بعد اسرائیلی افواج نے غزہ سے واپسی کا عمل شروع کر دیا ہے، جس کے بعد ہزاروں بے گھر فلسطینی شمالی علاقوں کی جانب واپسی کے لیے نکل پڑے ہیں۔

الجزیرہ ٹی وی کی رپورٹ کے مطابق، فلسطینی خاندان جو مغربی علاقوں میں پناہ گزین تھے، اب غزہ شہر اور دیگر مرکزی علاقوں کی جانب واپس جا رہے ہیں، جہاں سے انہیں پہلے جبری طور پر بے دخل کر دیا گیا تھا۔

ذرائع کے مطابق، اسرائیلی افواج کی کچھ بریگیڈز اور یونٹس نے غزہ کے مرکزی حصے کو بھی خالی کرنا شروع کر دیا ہے۔

النصیرات کیمپ میں عارضی پناہ لینے والے کئی خاندان بھی اب شمالی غزہ کا رخ کر رہے ہیں، تاہم وہ اب بھی نتساریم کاریڈور میں فوجی انخلا مکمل ہونے کا انتظار کر رہے ہیں۔ متاثرہ خاندانوں کا کہنا ہے کہ جب تک آخری اسرائیلی ٹینک علاقے سے نہیں نکل جاتا، وہ اپنے گھروں کو واپس نہیں جائیں گے۔

الجزیرہ کے مطابق، جنگ بندی معاہدے کے باوجود علاقے میں اسرائیلی ڈرونز، جنگی طیارے اور نیوی کی موجودگی بدستور دیکھی گئی ہے، اور واپس جانے والے کئی فلسطینیوں پر حملوں کی اطلاعات بھی سامنے آئی ہیں۔

یاد رہے کہ اسرائیلی کابینہ نے جمعہ، 10 اکتوبر کو سیزفائر معاہدے کے پہلے مرحلے کی منظوری دی تھی، جس کے تحت قیدیوں کا تبادلہ اور فوجی انخلا شامل ہے۔

حماس کی مذاکراتی ٹیم کے سربراہ خلیل الحیہ نے تصدیق کی ہے کہ انہیں امریکا اور دیگر ثالث ممالک کی طرف سے یقین دہانی کروائی گئی ہے کہ سیزفائر کے اس مرحلے کی منظوری کا مطلب ہے کہ غزہ میں جنگ ختم ہو گئی ہے۔

معاہدے کے تحت 24 گھنٹوں میں لڑائی ختم ہونا تھی، جبکہ حماس کو 72 گھنٹوں میں اسرائیلی قیدیوں کی رہائی یقینی بنانے کی ہدایت دی گئی ہے۔

واضح رہے کہ اکتوبر 2023 سے شروع ہونے والی اس جنگ میں اب تک 67,000 سے زائد فلسطینی شہید اور 1 لاکھ 69 ہزار سے زائد زخمی ہو چکے ہیں، جبکہ ہزاروں شہری اب بھی ملبے تلے دبے ہونے کا خدشہ ہے۔