سلطان آف جوہر ہاکی کپ: پاکستان اور بھارت کی جونیئر ٹیموں کا مثبت رویہ

ملائیشیا میں جاری سلطان آف جوہر ہاکی کپ میں پاکستان اور بھارت کی جونیئر ٹیموں نے کھیل کے آغاز میں ایک دوسرے کے ساتھ روایتی انداز میں "ہائی فائیو" کر کے اسپورٹس مین اسپرٹ کا مظاہرہ کیا، جسے ماہرین نے خوش آئند قدم قرار دیا ہے۔

میچ کا اختتام 3-3 گول سے برابر رہا۔ پاکستان کی جانب سے دو گول سفیان خان اور ایک گول حنان شاہد نے اسکور کیا۔

میچ سے قبل دونوں ٹیموں نے قومی ترانوں کے احترام کے بعد ہائی فائیو کرتے ہوئے ایک دوسرے سے خیرسگالی کا اظہار کیا۔ کھلاڑی تالیاں بجاتے ہوئے ایک قطار میں آگے بڑھتے رہے، جس سے دونوں ممالک کے درمیان کشیدگی کے برعکس ایک مثبت پیغام گیا۔

یاد رہے کہ اسپورٹس مین اسپرٹ کے اس مظاہرے کو خاص اہمیت دی جا رہی ہے، کیونکہ حالیہ مہینوں میں کرکٹ کے میدان میں بھارت اور پاکستان کے درمیان تناؤ نظر آیا تھا۔

ایشیا کپ کرکٹ ٹورنامنٹ (9 سے 28 ستمبر) کے دوران، 14 ستمبر کو بھارت کے کپتان سوریا کمار یادیو نے پاکستانی کپتان سے ہاتھ ملانے سے انکار کیا تھا، جس پر دونوں ممالک کے کرکٹ شائقین میں مایوسی پھیلی تھی۔ اس کے بعد 21 ستمبر اور 28 ستمبر کو ہونے والے میچز میں بھی بھارتی کھلاڑیوں نے ہاتھ ملانے سے گریز کیا۔

اسی طرح، آئی سی سی ویمنز ورلڈ کپ کے دوران 5 اکتوبر کو کولمبو میں ہونے والے پاکستان-بھارت میچ میں بھی، بھارتی کپتان کی جانب سے ہینڈ شیک سے اجتناب کیا گیا۔

تاہم، ہاکی کے میدان میں دونوں ملکوں کے نوجوان کھلاڑیوں نے مثالی رویہ اختیار کرتے ہوئے اس منفی روایت کو توڑا اور مثبت انداز میں ایک دوسرے کو خوش آمدید کہا۔