فیفا غزہ میں فٹبال سہولیات کی بحالی میں بھرپور کردار ادا کرے گا، صدر جیانی انفنتینو

فٹبال کی عالمی تنظیم (فیفا) کے صدر جیانی انفنتینو نے کہا ہے کہ جنگ بندی کے بعد غزہ میں فٹبال کے تمام انفراسٹرکچر کی ازسرِ نو تعمیر کی جائے گی، اور فیفا اس عمل میں اپنا مکمل کردار ادا کرے گا۔

ان خیالات کا اظہار انہوں نے غزہ امن اجلاس کے موقع پر کیا، جس کی مشترکہ صدارت امریکی صدر ڈونلڈ ٹرمپ اور مصری صدر عبدالفتاح السیسی نے کی۔ اجلاس کا مقصد حالیہ جنگ بندی کو مضبوط بنانا، دو سال سے جاری تنازع کا خاتمہ اور غزہ میں طویل مدتی امن و تعمیرِ نو کے منصوبوں پر غور کرنا تھا۔

اس اہم اجلاس میں مسلم اور عرب دنیا کے متعدد رہنماؤں کے علاوہ اقوامِ متحدہ کے سیکریٹری جنرل انتونیو گوتریس اور یورپی ممالک کے اعلیٰ حکام نے بھی شرکت کی۔

فیفا سربراہ جیانی انفنتینو نے کہا، "فٹبال کا مقصد صرف کھیل نہیں بلکہ امید، اتحاد اور مثبت سوچ کو فروغ دینا ہے۔ ہم فلسطین کے ہر کونے میں فٹبال واپس لائیں گے۔"

انہوں نے اعلان کیا کہ فیفا فلسطین فٹبال ایسوسی ایشن کے ساتھ مل کر میدانوں کی تعمیر، کوچز کی فراہمی، ٹورنامنٹس کے انعقاد اور فٹبال کے ڈھانچے کی بحالی کے لیے ایک خصوصی فنڈ قائم کرے گا۔

انفنتینو نے مزید بتایا کہ فیفا پہلے ہی فلسطین میں "منی پچز" اور "فیفا ایرینا پروگرام" کے ذریعے عملی معاونت فراہم کر رہا ہے۔ ان کا کہنا تھا کہ، "فٹبال بچوں کو خواب دیکھنے اور امید رکھنے کی طاقت دیتا ہے — اور آج کی دنیا میں یہ سب سے زیادہ ضروری ہے۔"

انہوں نے امریکی صدر ٹرمپ کی امن کوششوں کو بھی سراہا اور کہا، "صدر ٹرمپ نے رکاوٹیں دور کیں، مختلف ممالک کو یکجا کیا اور امن کی راہ ہموار کی۔ ان کے بغیر یہ سب ممکن نہ ہوتا۔"