ڈائریکٹر جنرل ہیلتھ سروسز پنجاب ڈاکٹر خالد محمود کا ضلع راجن پور اور ڈیرہ غازی خان کا دورہ

ڈی جی خان: وزیراعلیٰ پنجاب محترمہ مریم نواز شریف کے ویژن اور وزیر صحت پنجاب خواجہ عمران نذیر و سیکرٹری صحت و آبادی پنجاب لاہور کی خصوصی ہدایات پر، ڈائریکٹر جنرل ہیلتھ سروسز پنجاب ڈاکٹر خالد محمود نے اپنی مانیٹرنگ ٹیم کے ہمراہ ضلع راجن پور اور ڈیرہ غازی خان کا تفصیلی دورہ کیا۔

دورے کے دوران ڈاکٹر خالد محمود نے دونوں اضلاع میں صحت عامہ کی صورتحال، طبی سہولیات، اور دستیاب وسائل کا جائزہ لیا۔ انہوں نے مختلف مراکز صحت میں مریضوں کی عیادت کی، ادویات کے اسٹاک کو فزیکلی چیک کیا، اور ہدایت جاری کی کہ مریضوں کو ادویات کی فراہمی ہر صورت یقینی بنائی جائے۔

مزید برآں، ڈی جی ہیلتھ سروسز پنجاب نے سی ای او ہیلتھ راجن پور اور سی ای او ہیلتھ ڈیرہ غازی خان کے ہمراہ ایک تفصیلی اجلاس میں شرکت کی۔
اس موقع پر افسران کی جانب سے ہیلتھ پروفائل، فیلڈ سرگرمیوں، اور جاری صحت عامہ کے پروگرامز پر تفصیلی بریفنگ پیش کی گئی۔

بریفنگ میں فلڈ ریسپانس کیمپس، ڈینگی کنٹرول مہم، ورٹیکل پروگرامز، مریم نواز ہیلتھ کلینک منصوبہ، ادویات و ویکسینیشن اسٹاک سمیت دیگر اہم امور پر تفصیلی پیش رفت بیان کی گئی۔

دورے کے دوران ڈیرہ غازی خان کی اربن یونین کونسل میں قائم کلینک اِن ویل کا بھی معائنہ کیا گیا، جہاں فراہم کی جانے والی سہولیات، عملے کی کارکردگی، اور مریضوں کو دی جانے والی خدمات کا جائزہ لیا گیا۔

ڈاکٹر خالد محمود نے اس  موقع پر کہا کہ کسی بھی قسم کی کوتاہی، غفلت یا لاپرواہی ہرگز برداشت نہیں کی جائے گی۔ عوام کو معیاری اور بروقت صحت کی سہولیات فراہم کرنا حکومت پنجاب کی اولین ترجیح ہے۔"

انہوں نے مزید کہا کہ وزیراعلیٰ پنجاب محترمہ مریم نواز شریف کی قیادت میں محکمہ صحت صوبے کے تمام اضلاع، خصوصاً جنوبی پنجاب کے پسماندہ علاقوں میں صحت کے نظام کو جدید خطوط پر استوار کرنے کے لیے پرعزم ہے۔