دالبندین میں فورسز کی کارروائی، 6دہشت گرد ہلاک

بلوچستان کے علاقے دالبندین میں سیکیورٹی فورسز نے دہشت گرد تنظیم کے خلاف کامیاب کارروائی کرتے ہوئے چھ دہشت گردوں کو ہلاک کر دیا۔
سیکیورٹی ذرائع کے مطابق، کارروائی دہشت گرد گروہ ’’فتنہ الہندوستان‘‘ کے خلاف کی گئی، جس کے نتیجے میں گروہ کی موجودگی اور اس کی سرگرمیوں کا خاتمہ کر دیا گیا ہے۔

ذرائع کے مطابق دہشت گرد ایک پہاڑی علاقے میں واقع غار میں چھپے ہوئے تھے۔ فضائی نگرانی کے ذریعے ان پر مسلسل نظر رکھی گئی اور مناسب وقت پر مؤثر کارروائی کی گئی، جس میں تمام دہشت گرد مارے گئے۔

سیکیورٹی اداروں کا کہنا ہے کہ یہ کامیابی انٹیلی جنس معلومات، خفیہ اداروں اور فورسز کے درمیان مؤثر ہم آہنگی اور تعاون کا نتیجہ ہے۔

حکام نے اس عزم کا اظہار کیا کہ بلوچستان میں قیامِ امن اور دہشت گردی کے مکمل خاتمے تک سیکیورٹی آپریشنز جاری رہیں گے۔