وزیراعظم نے صنعتی اور زرعی شعبے کیلئے بجلی کی قیمت میں کمی کا اعلان کردیا،فی یونٹ کتنا سستا ہوا؟

اسلام آباد: وزیرِ اعظم محمد شہباز شریف نے ملکی صنعت و زراعت کی ترقی کے لیے بڑا اقدام اٹھاتے ہوئے “روشن معیشت بجلی پیکیج” کا اعلان کر دیا۔

تفصیلات کے مطابق یہ اعلان وزیرِ اعظم نے صنعتی و زرعی شعبے کے ماہرین اور کاروباری برادری کے وفد سے ملاقات کے دوران کیا۔

پیکیج کے تحت صنعتوں اور کسانوں کو آئندہ تین سالوں (نومبر 2025 سے اکتوبر 2028) میں رعایتی قیمت پر اضافی بجلی فراہم کی جائے گی،جبکہ  صنعتی شعبے کو 34 روپے اور زرعی شعبے کو 38 روپے فی یونٹ کے بجائے، 22 روپے 98 پیسے فی یونٹ کے رعایتی نرخ پر اضافی بجلی دی جائے گی۔

وزیرِ اعظم نے واضح کیا کہ اس پیکیج کے تحت فراہم کی جانے والی بجلی کا بوجھ نہ تو گھریلو صارفین پر ڈالا جائے گا اور نہ ہی کسی دوسرے شعبے پر۔

انہوں نے کہا کہ یہ اقدام ملکی معیشت کے استحکام، صنعت و زراعت کی ترقی، روزگار کے مواقع میں اضافے اور برآمدات بڑھانے کی جانب اہم قدم ہے،ان کا مزید کہنا تھا کہ گزشتہ برس موسمِ سرما میں دیے گئے پیکیج کے تحت صنعتی و زرعی شعبے نے 410 گیگاواٹ اضافی بجلی استعمال کی، جس سے صنعتوں کا پہیہ چلا، برآمدات میں اضافہ ہوا اور ہزاروں افراد کو روزگار ملا۔

شہباز شریف نے کہا کہ معاشی بحران سے معاشی استحکام کا سفر کٹھن ضرور تھا لیکن معاشی ٹیم کی محنت اور آپ سب کے تعاون سے یہ ممکن ہوا، صنعت و زراعت کے شعبے ترقی کریں گے تو ملک کو قرضوں سے نجات ملے گی، اللہ کے فضل کرم سے بہتر پالیسیوں کی بدولت معاشی اشاریے بہتر ہوئے۔

وزیرِ اعظم نے وزیرِ بجلی سردار اویس لغاری اور ان کی ٹیم کی کاوشوں کو بھی سراہا اور کہا کہ ملکی صنعتوں اور زراعت کی ترقی کے بغیر معاشی استحکام ممکن نہیں۔ انہوں نے اس عزم کا اظہار کیا کہ حکومت کاروباری آسانیوں اور خطے میں مسابقت بڑھانے کے لیے ہر ممکن اقدامات جاری رکھے گی۔