بلوچستان کے بعد سندھ حکومت کی بھی خیبرپختونخوا کی مسترد شدہ بکتر بند گاڑیاں لینے کی درخواست

بلوچستان کے بعد اب سندھ حکومت نے بھی وفاقی حکومت سے درخواست کی ہے کہ خیبرپختونخوا کی جانب سے مسترد کی گئی بکتر بند (آرمڈ) گاڑیاں سندھ کو فراہم کی جائیں۔

تفصیلات کے مطابق، پیر کے روز خیبرپختونخوا کے وزیرِاعلیٰ سہیل آفریدی نے وفاقی حکومت پر تنقید کرتے ہوئے کہا تھا کہ وفاق کی ناقص پالیسیوں کی وجہ سے صوبے میں دہشت گردی کے واقعات دوبارہ بڑھ رہے ہیں۔

انہوں نے الزام عائد کیا تھا کہ وفاقی حکومت نہ صرف خیبرپختونخوا کو انسدادِ دہشت گردی کے فنڈز دینے سے گریز کر رہی ہے بلکہ آئینی حقوق کی فراہمی میں بھی رکاوٹ ڈال رہی ہے۔

وزیرِاعلیٰ کے مطابق، وزیرِ داخلہ محسن نقوی کی جانب سے بھیجی گئی بلٹ پروف گاڑیاں پرانی اور ناقص ہیں، جنہیں واپس کرنے کی ہدایت کردی گئی تھی۔

بعد ازاں، وزیرِاعلیٰ بلوچستان سرفراز بگٹی نے معاملے میں مداخلت کرتے ہوئے کہا کہ خیبرپختونخوا کی طرح بلوچستان بھی دہشت گردی سے متاثر ہے، لہٰذا اگر وہ گاڑیاں وہاں استعمال نہیں ہوتیں تو انہیں بلوچستان حکومت کے حوالے کیا جائے۔

اس درخواست کے بعد وفاقی وزیرِ داخلہ محسن نقوی نے خیبرپختونخوا کے لیے مختص بلٹ پروف گاڑیاں بلوچستان کو منتقل کرنے کی منظوری دے دی۔

اب، تازہ پیش رفت میں سندھ کے محکمہ داخلہ نے بھی وفاق سے مطالبہ کیا ہے کہ خیبرپختونخوا کی جانب سے مسترد کی گئی بکتر بند گاڑیاں سندھ حکومت کو فراہم کی جائیں تاکہ سیکیورٹی اداروں کی استعداد بڑھائی جا سکے۔