جھگڑے والی رات الگ سونا ہی بہتر‘ مریم نفیس کا ازدواجی مشورہ

اداکارہ مریم نفیس نے انکشاف کیا ہے کہ وہ اور ان کے شوہر امان احمد ازدواجی اختلافات کے دوران معاملات کو بہتر انداز میں سلجھانے کے لیے ایک خاص اصول پر عمل کرتے ہیں — وہ یہ کہ جھگڑے والی رات ایک ساتھ نہیں سوتے۔

مریم نفیس نے حال ہی میں ایک  مارننگ شو میں شرکت کی، جہاں انہوں نے اپنی گھریلو اور ازدواجی زندگی سے متعلق کھل کر بات کی۔

انہوں نے کہا کہ میاں بیوی کے درمیان اختلافات یا جھگڑے معمول کی بات ہیں، لیکن ان مسائل کو بات چیت اور سمجھوتے کے ذریعے حل کرنا ضروری ہے، کیونکہ خاموشی یا نظرانداز کرنا مسائل کو مزید بڑھا دیتا ہے۔

پروگرام میں موجود ماہرینِ صحت نے بھی بتایا کہ تنازعات کے دوران انسانی جسم میں کارٹیسول ہارمون کی مقدار بڑھ جاتی ہے، جو منفی سوچوں میں اضافے کا باعث بنتی ہے۔

مریم نفیس نے بتایا کہ ان کے اور ان کے شوہر کے درمیان ایک اصول طے ہے کہ اگر کسی رات جھگڑا ہو جائے تو وہ الگ الگ کمروں میں سو جاتے ہیں۔ اس سے دونوں کو سوچنے اور اپنے جذبات پر قابو پانے کا وقت ملتا ہے۔

انہوں نے مزید کہا کہ اگلی صبح وہ ناشتے کے دوران بیٹھ کر اختلافات پر بات کرتے ہیں، جس سے بات چیت کے ذریعے مسئلہ حل ہو جاتا ہے۔
اداکارہ کے مطابق اس طریقے پر عمل کرنے سے وہ اپنے رشتے میں غلط فہمیاں اور کشیدگی پیدا ہونے سے بچاتے ہیں۔

خیال رہے کہ مریم نفیس نے ہدایتکار امان احمد سے مارچ 2022 میں شادی کی تھی، اور مارچ 2025 میں ان کے ہاں پہلے بیٹے عیسیٰ کی پیدائش ہوئی۔
یہ جوڑا متعدد مواقع پر ٹی وی پروگراموں میں ایک ساتھ شرکت کر چکا ہے اور ہمیشہ افہام و تفہیم اور مثبت رویے کو ازدواجی خوشیوں کا راز قرار دیتا ہے۔