ٹرمپ کا نیا دعویٰ: “پاکستان اور بھارت کی جھڑپ میں سات نئے طیارے مار گرائے گئے

امریکی صدر ڈونلڈ ٹرمپ نے ایک بار پھر دعویٰ کیا ہے کہ مئی میں پاکستان اور بھارت کے درمیان مختصر فوجی کشیدگی کے دوران سات “بالکل نئے اور خوبصورت طیارے” تباہ ہوئے تھے۔

جاپان میں کاروباری رہنماؤں سے عشائیے کے دوران گفتگو کرتے ہوئے ٹرمپ نے کہا کہ ان کی جانب سے مختلف ممالک پر عائد کردہ تجارتی محصولات (ٹیرِف) نے دنیا میں کئی جنگیں رکوا دیں۔

انہوں نے کہا، “اگر آپ بھارت اور پاکستان کو دیکھیں، وہ لڑائی کے قریب تھے، ان کی جھڑپ میں سات بالکل نئے طیارے مار گرائے گئے۔ میں نے وزیر اعظم مودی، وزیر اعظم شہباز شریف اور فیلڈ مارشل عاصم منیر سے کہا کہ اگر تم لوگ لڑو گے تو ہم کوئی تجارتی معاہدہ نہیں کریں گے، جس کے بعد معاملہ 24 گھنٹوں میں ختم ہو گیا۔”

ٹرمپ نے مزید کہا کہ تجارت جنگ نہ ہونے کی 70 فیصد وجہ ہے۔

یاد رہے کہ مئی میں ہونے والی پاک بھارت جھڑپ دہائیوں میں دونوں ممالک کے درمیان بدترین تصادم قرار دی گئی تھی۔ یہ تنازع کشمیر کے علاقے پہلگام میں مبینہ فالس فلیگ آپریشن کے بعد شروع ہوا تھا، جس میں بھارت نے بغیر ثبوت کے پاکستان پر الزامات لگائے تھے، تاہم اسلام آباد نے انہیں سختی سے مسترد کر دیا۔

جھڑپ کے بعد پاکستان نے بھارت کے چھ جنگی طیارے مار گرائے جانے کا دعویٰ کیا تھا، جن میں ایک فرانسیسی ساختہ رافیل بھی شامل تھا۔ بھارت نے ابتدا میں اس تردید کی، مگر بعد میں جزوی طور پر نقصان تسلیم کر لیا، تاہم مار گرائے گئے طیاروں کی تعداد آج تک ظاہر نہیں کی گئی۔