سربراہ پاک بحریہ کادورہ بنگلادیش ، اعلیٰ عسکری و دفاعی حکام سے ملاقاتیں

راولپنڈی: سربراہ پاک بحریہ ایڈمرل نوید اشرف کا بنگلادیش کا اہم دورہ مکمل ہوگیا، اس دوران انہوں نے اعلیٰ عسکری و دفاعی حکام سے ملاقاتیں کیں جس میں باہمی دلچسپی کے امور، علاقائی بحری سلامتی اور دفاعی تعاون کے فروغ پر تبادلہ خیال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق دونوں ممالک نے خطے میں امن و استحکام کے فروغ کے عزم کا اعادہ کیا،ایڈمرل نوید اشرف نے نیشنل ڈیفنس کالج بنگلہ دیش کا دورہ بھی کیا جہاں انہوں نے صدر نیشنل ڈیفنس کالج بنگلا دیش اور فیکلٹی اراکین سے ملاقاتیں کی۔

آئی ایس پی آر کے مطابق پاک بحریہ کے جہاز پی این ایس سیف نے چٹاگانگ بندرگاہ کا دورہ کیا، نیول چیف کی بنگلہ دیش کے آرمی، نیوی اور ایئر چیف سے ملاقاتیں بھی ہوئیں،علاوہ ازاں نہوں نے بنگلہ دیش نیول اکیڈمی کا دورہ بھی کیا ، کمانڈنٹ اور اساتذہ سے ملاقات کیں۔

شعبہ تعلقات عامہ کے مطابق نیول چیف نے بنگلہ دیش نیول اکیڈمی کا دورہ کیا، تربیتی معیار کو سراہا، اکیڈمی میں تعلیمی و پیشہ ورانہ تعاون بڑھانے پر زور دیا۔

نیول چیف نے تعلیم و تربیت میں اشتراک اور جدید بحری علوم کو فروغ دینے کی اہمیت پر زور دیا،ایڈمرل نوید اشرف  کے اعزاز میں استقبالیہ بھی منعقد کیا گیا۔

ترجمان کے مطابق نیول چیف ایڈمرل نوید اشرف کا دورہ پاکستان اور بنگلہ دیش کے درمیان بحری تعلقات کو مزید مضبوط بنانے کا باعث ہے۔