اوپن اے آئی نے جی پی ٹی 5.1 اے آئی ماڈل متعارف کرا دیا

اوپن اے آئی نے جی پی ٹی 5.1 آرٹی فیشل انٹیلی جنس (اے آئی) ماڈل متعارف کرا دیا ہے جس میں چیٹ جی پی ٹی کے انسٹنٹ اور تھنکنگ ورژنز کو باہم ملا دیا گیا ہے۔

کمپنی نے کچھ عرصے قبل جی پی ٹی 5 اے آئی ماڈل متعارف کرایا تھا اور اب نئے ورژن میں لچکداری، شفافیت اور ردعمل پر توجہ مرکوز کی گئی۔اس نئے ماڈل میں چیٹ جی پی ٹی کو زیادہ بہتر بنایا گیا ہے تاکہ صارفین کو چیٹ جی پی ٹی ایک بات کرنے والے اے آئی چیٹ بوٹ سے زیادہ اہم محسوس ہو۔

جی پی ٹی 5.1 انسٹنٹ بیشتر افراد کے لیے بائی ڈیفالٹ ماڈل ہوگا۔ جی پی ٹی 5.1 تھنکنگ زیادہ پیچیدہ ٹاسکس کے لیے بہترین ماڈل ثابت ہوگا اور اکٹھے ملکر یہ دونوں جی پی ٹی 5 کے حوالے سے صارفین کی جانب سے کی جانے والی شکایات کا ازالہ کریں گے۔

ان ماڈلز سے ہٹ کر اوپن اے آئی کی جانب سے پہلے سے زیادہ بہتر ٹون کنٹرول سسٹم بھی متعارف کرایا جا رہا ہے۔ چیٹ جی پی ٹی میں پرسنلٹی فیچر کچھ ماہ قبل متعارف کرایا گیا تھا مگر اب اس کا استعمال آسان ہو جائے گا جبکہ صارفین اسے رئیل ٹائم میں ایڈجسٹ کرسکیں گے۔

آپ چیٹ جی پی ٹی کے ردعمل کی ٹونز اور اسٹائلز کو منتخب کرسکیں گے اور ان کا اطلاق فوری طور پر تمام چیٹس پر ہوگا۔ یہ نیا اے آئی ماڈل 3 ماہ تک پرانے ماڈلز کے ساتھ دستیاب ہوگا اور صارفین کو تمام ورژنز کا موازنہ کرنے میں مدد ملے گی اور وہ اس پر فیڈ بیک دے کر فیصلہ کرسکیں گے کہ ان کے لیے کونسا ماڈل بہترین ہے۔

اوپن اے آئی کو ماہانہ فیس ادا کرنے والے صارفین ان ماڈلز کو پہلے دیکھ سکیں گے جبکہ جلد مفت صارفین کو بھی یہ سہولت دستیاب ہوگی۔