5 بڑوں کے مل بیٹھنے کی تجویز رانا ثنا اللہ کی ذاتی رائے ہے،شیخ وقاص اکرام کا ردعمل

اسلا م آباد: پاکستان تحریک انصاف(پی ٹی آئی) کے ترجمان شیخ وقاص اکرم نے رانا ثناء اللہ کے پانچ بڑوں کو مل بیٹھنے کے بیان پرردعمل دیتے ہوئے کہا ہے کہ یہ رانا ثناء اللہ کی ذاتی رائے ہے،وہ رائے دینے کا حق رکھتے ہیں،ان کے بیان سے یہ تو ثابت ہوا کہ عمران خان کے بغیر ان حالات کا کوئی حل نہیں۔

تفصیلات کے مطابق اپنے بیان میں ترجمان پی ٹی آئی کا کہنا تھا کہ رانا ثناء اللہ کو یہ بھی سمجھنا چاہیئے کہ بانی پی ٹی آئی مینڈیٹ چوروں کے ساتھ نہیں بیٹھیں گے۔

ترجمان پی ٹی آئی نے مزید کہا کہ اگر رانا ثنا اللہ مفاہمت کی بات کرتے ہیں تو انہیں آئین کی بحالی اور عدلیہ کو مکمل آزادی دینے کی بات کرنی چاہیے۔ ان کا کہنا تھا کہ حقیقی مفاہمت اسی صورت ممکن ہے جب آئینی بالادستی اور قانون کی حکمرانی کو یقینی بنایا جائے،عدلیہ کی آزادی سے ہمارے ناحق اسیر رہنما بھی فوری رہا ہوجائیں گے۔

اپنے بیان میں شیخ وقاص اکرم کا کہنا تھا کہ ملک میں خود مختار الیکشن کرائیں،اسی سے ملک کی بہتری کا راستہ نکلے گا،سب جانتے ہیں 2024کے الیکشن میں ہمارا مینڈیٹ چوری ہوا،مینڈیٹ چوری ہونے پر پی ٹی آئی خاموش نہیں بیٹھے گی۔ 

ترجمان پی ٹی آئی کا مزید کہنا تھا کہ مفاہمت کا صرف یہ مطلب نہیں بانی پی ٹی آئی کو مذاکرات میں بٹھایا جائے۔ 

واضح رہے کہ گزشتہ روز نجی ٹی وی پروگرام میں گفتگو کے دوران رانا ثنا اللہ نے تجویز پیش کرتے ہوئے کہا تھا کہ ملک کے 5 بڑوں کو اعتماد سازی کے لیے مل بیٹھنے کی ضرورت ہے۔

ان 5 بڑوں میں صدرمملکت آصف علی زرداری، وزیراعظم شہباز شریف، نواز شریف، بانی پی ٹی آئی عمران خان شامل ہیں۔