عوامی شکایات کو بروقت حل نہ کرنے پر وزیر اعظم کا نوٹس

تفصیلات کے مطابق    غیر سنجیدہ اور موثر کارکردگی نہ دکھانے والے سرکاری افسران کے خلاف ایکشن شروع ہوگیا،چیف سیکریٹری پنجاب نے ماتحت 1586 افسران کے ڈیش بورڈ کی جانچ پڑتال مکمل کر لی۔ پرفارمنس ڈیلیوری یونٹ کی رپورٹ وزیراعظم کو پیش کردی گئی۔

وزیر اعظم آفس کے مطابق263 افسران کو کارکردگی کی بنیاد پر وارننگ ،7 سرکاری افسران کو شوکاز نوٹس جاری کردیا گیا۔833 افسران کو محتاط رہنے کی ہدایت، 111 افسران سے وضاحت طلب کرلی گئی،جبکہ  403 سرکاری افسران کی کارکردگی کو سراہا گیا۔سیکرٹری اطلاعات،زراعت،ایکسائز اور سیکرٹری آبپاشی کو کارکردگی بہتر کرنے کا مراسلہ جاری کردیا، وزیراعظم نے کابینہ اجلاس کے دوران سرکاری افسران کی ناقص کارکردگی کا نوٹس لیا تھا۔وفاقی وزراء نے بھی بیوروکریسی کے غیر سنجیدہ رویے کی شکایت کی تھی۔

وزیر اعظم آفس کا کہنا ہے کہ   ڈپٹی کمشنر لاہور، گجرات، شیخو پورہ سمیت پنجاب کے 20 ڈپٹی کمشنرز کو مراسلے جاری کردیے گئے ہیں ،تمام افسران عوام کوبہتر سہولیات کی فراہمی کے لیے کارکردگی کو بہتر کریں جبکہ اسسٹنٹ کمشنر رائیونڈ،لیہ،جھنگ ، بُورےوالا، صادق آباد، ننکانہ صاحب، پنڈی گھیب، سمیت 43 اسسٹنٹ کمشنرز کو شوکازنوٹس جاری کیا گیا۔وارننگ لیٹر جاری کرنے کا مقصد تمام افسران کو تنبیہ کرنا ہے۔ وزیراعظم کے ویژن کے مطابق عوام کو سہولیات مہیا کرنے کے لیے اقدامات کیے جا رہے ہیں۔