نظام تباہ کرنے میں دیرنہیں لگتی مگردرست کرنےمیں وقت لگتاہے : عمران خان

تفصیلات کے مطابق عوام کے سوالات کا براہ راست ٹیلی فون پر جواب دیتے ہوئے وزیر اعظم پاکستان نے حکومت سندھ کو مخاطب کرکے کہا کہ جب تک آپ کے پاس لاک ڈاؤن کا جواب نہیں ہے تب تک مکمل لاک ڈاؤن مت کریں کیونکہ ایسی غلطی بھارت نے کی تھی جس سے ان کے ملک میں تباہی کا منظر ہے، ان کی معیشت کو غیرععمولی نقصان پہنچا ہے ۔

عمران خان نے کہا کہ ملک کورونا وائرس کی چوتھی لہر کا سامنا کررہا ہے ، بھارت سے آنے والا ڈیلٹا ویرینٹ سب سے زیادہ خطرناک ہے اور خطرے کو ماسک کے ذریعے کم کیا جا سکتا ہے۔

وزیر اعظم نے کہا کہ اسمارٹ لاک ڈاؤن کی وجہ سے پاکستان پڑوسی ملک بھارت کے مقابلے میں بہت بہتر حالات میں ہے ، اسمارٹ لاک ڈاؤن کی وجہ سے پوری دنیا نے کورونا سے نمٹنے کے لیے ہمارے تعریف کی ہے ۔

احساس پروگرام سے متعلق ایک سوال کے جواب میں عمران خان  نے کہا کہ مذکورہ پروگرام کے تحت متعدد امور انجام دیے جارہے ہیں تاہم جو قابل ذکر بات ہے کہ ہمارے پاس ڈیٹا جمع ہوگیا ہے جس کی بنیاد پر ہم ضرورت مند خاندانوں کو براہ راست سبسڈی دے سکیں گے۔

وزیر اعظم کہا ہے کہ ہر شخص رواں موسم میں ایک درخت ضرور لگائے اور اس کا دھیان رکھنے کا عزم کرے، ہمارے ملک میں جنگلات ختم ہوتے جارہے ہیں۔

وزیر اعظم عمران خان نے اسپورٹس کے حوالے سے بات کرتے ہوئے کہا ہے کہ اسپورٹس کی دنیا میں پاکستان نے بھرپور نام کمایالیکن پھر تنزلی بھی دیکھی، بدقسمتی سے سابقہ دونوں حکومتی ادوار میں صرف کرپشن نہیں کی گئی بلکہ اداروں کو بھی تباہ کردیا گیا، پیسہ لوٹنے کے لیے اداروں کو کمزور کرنا پڑتا ہے ، اداروں میں اپنے سیاسی لوگوں کو مقرر یا تعینات کیا گیا اور اس کے نتیجے میں اسپورٹس کے زوال کا عمل شروع ہوگیا۔

وزیر اعظم کا مزید کہنا تھا کہ نورمقدم کیس کا قاتل کسی طور پر بچے گا نہیں ،اس کیس سے سب کو ایک صدمہ ہوا ہے ، نورمقدم کےقتل کا واقعہ دو دن میں ہوا اور اس میں ملوث تمام کرداروں کو سزا ہوگی، انہوں نے کہا کوئی یہ نا سمجھے کہ نور مقدم کا قاتل بااثر ہونے کی وجہ سے بچ جائے گا۔

 انہوں نے کہا کہ افغان سفیر کی بیٹی کے کیس کو بھی دیکھ رہا ہوں۔