سعودی حکومت کی جانب سے بڑی پابندی عائد

عرب میڈیا کی رپورٹ کے مطابق مملکت میں کورونا ویکسینیشن کے حوالے سے ڈیڈ لائن ختم ہوگئی اب شاپنگ مالز اور پبلک مقامات پر ویکسین لگوانے والے ہی جا سکیں گے۔

سعودی وزارت تجارت کے ترجمان عبدالرحمن الحسین کا کہنا ہے کہ اتوار یکم اگست سے توکلنا ایپ پر’ویکسینیڈڈ‘ کے اسٹیٹس کے حامل افراد ہی مارکیٹوں میں داخل ہو سکیں گے دیگر کو اجازت نہیں ہوگی۔

کوروناوائرس کی روک تھام کے لیے یہ منصوبہ وزارت تجارت نے ادارہ امور صحت کے اشتراک سے تیار کیا تھا ور اس پر عمل درآمد کے لیے یکم اگست کی ڈیڈ لائن دی گئی تھی۔

سعودی حکام نے خبردار کردیا ہے کہ یکم اگست 2021 سے ہر وہ شخص جس نے ویکسین نہیں لگوائی وہ سرکاری، نجی اداروں کے علاوہ شاپنگ مالز، ریستوران ، کیفٹریا اور دیگر تجارتی اداروں میں داخل نہیں ہوسکے گا۔

وزارت تجارت نے متعلقہ اداروں کو ہدایت کی کہ وہ اس پالیسی پر عمل درآمد ہر صورت یقینی بنائیں۔

خیال رہے کہ اس سے قبل سرکاری و نجی اداروں کے علاوہ مارکیٹوں اور تجارتی مقامات پر’توکلنا‘ ایپ کے بغیر داخلہ منع تھا تاہم اب اس قانون میں ویکسینیشن کی شرط بھی عائد کردی گئی ہے۔