پاک بحریہ اور میری ٹائم سکیورٹی نے 15رکنی افریقی کریو کو بچا لیا

سمندر میں ریسکیو کئے گئے افریقی جہاز کے عملے کو کراچی بندرگاہ پر حفاظت سے پہنچا دیا گیا ہے۔پاکستان میری ٹائم سکیورٹی ایجنسی (پی ایم ایس اے) کا جہاز عملے کو لے کر کراچی بندرگاہ پہنچ گیا ہے۔

کراچی کے ساحل سے 180 ناٹیکل میل دور جنوب میں پھنسے افریقی مرچنٹ جہاز 'ایم وی سُواری ایچ' کے 18 رکنی عملے کو بچانے کے لیے ریسکیو آپریشن کیا گیا ، یہ جہاز  بھارتی شہر کاندلا سے صومالیہ جا رہا تھا۔

پاک بحریہ اور پاکستان میری ٹائم سیکیورٹی ایجنسی کے ہوائی جہازوں نے کھلے سمندر میں مشترکہ آپریشن کے دوران پھنسے ہوئے جہاز کے عملے کی قیمتی جانیں بچائیں، جہاز کا انجن بند ہوگیا تھا اور پانی بھرنے کے باعث جہاز ڈوب گیا تھا۔عملے کے 15 افراد کو بچالیا گیا جب کہ 3 افراد تاحال لاپتہ ہیں جن کی تلاش جاری ہے۔

آپریشن کے دوران جان بچانے کے لیے لائف رافٹس بھی فراہم کی گئیں، مرچنٹ شپ بھارت سے چینی اور دیگر غذائی اشیاء لے جارہا تھا ۔

پی این ایس اصلت اور میری ٹائم سیکیورٹی ایجنسی کے جہاز کشمیر نے مرچنٹ شپ کے عملے کو بندرگاہ پر پہنچایا، ریسکیو کیے جانے والے عملے کے تمام افراد کا تعلق شام سے ہے۔

خیال رہے کہ پاکستان نیوی  نیو۔ ایریا 9 (NAVAREA IX) کی کوآرڈینیٹر ہے اور میری ٹائم تحفظ کے ساتھ ساتھ سمندر میں مشکل میں پھنسے بحری اور ہوائی جہازوں کو مدد بھی فراہم کرتی ہے۔