ہر نسل کے دلوں پر راج کرنے والی معروف بھارتی گلوکارہ آشا بھوسلے انتقال کر گئیں

ممبئی:ہر نسل کے لوگوں کی پسندیدہ ،دنیائے موسیقی کی بے تاج ملکہ اور کروڑوں دلوں پر راج کرنے والی برصغیر کی لیجنڈری گلوکارہ آشا بھوسلے 92 برس کی عمر میں ممبئی میں انتقال کر گئیں،جس کے بعد بھارتی موسیقی کا ایک سنہری باب آج ہمیشہ کے لیے بند ہو گیا۔

بھارتی میڈیا رپورٹس کے مطابق لیجنڈری پلے بیک سنگر آشا بھوسلے کو اچانک طبیعت بگڑنے اور مبینہ طور پر دل کا دورہ پڑنے کے باعث ممبئی کے بریف کینڈی ہسپتال داخل کرایاگیاتھا۔

روپورٹس کے مطابق ہفتے کے روز آشا بھوسلے کو اچانک سینے میں تکلیف محسوس ہوئی جس کے بعد انہیں فوری طور پر طبی امداد کے لیے ہسپتال لے جایا گیا،تاہم وہ جانبر نہ ہو سکیں۔

انسٹاگرام اور ایکس پر ان کے لاکھوں فالوورز ان کے جدید دور کے ساتھ چلنے کے انداز کو بے حد پسند کرتے تھے۔ ان کا آخری ہندی گانا 2022 میں ریلیز ہوا۔
1933 میں پیدا ہونے والی آشا بھوسلے نے کم عمری میں موسیقی کا آغاز کیا، 1950 کی دہائی میں شہرت حاصل کی اور بالآخر دنیا کی معروف ترین پلے بیک گلوکاراؤں میں شمار ہونے لگیں، ان کی آوازچنچل، جذباتی اور بے حد ہمہ گیر تھی، انہوں نے کئی نسلوں کے موسیقی کے شائقین کو متاثر کیا۔

انہوں نے اپنے آٹھ دہائیوں پر محیط طویل کیریئر میں غزلوں، کلاسیکل اور جدید موسیقی ہر شعبے میں اپنی صلاحیت کا لوہا منوایا اور مختلف اداکاراؤں کے لیے اپنی آواز کا جادو بکھیرتی رہیں۔

آنجہانی گلوکارہ نے شرمیلا ٹیگور اور ریکھا سے لے کر ارمیلا ماتونڈکر اور ایشوریا رائے جیسی کئی نسلوں کی اداکاراؤں کے لیے اپنی آواز کا جادو جگایا۔

اپنے شاندار فنی سفر کے دوران انہوں نے ہزاروں گانے مختلف بھارتی زبانوں میں ریکارڈ کیے، جن میں کلاسیکی موسیقی، غزل، کیبریٹ، پاپ اور لوک موسیقی شامل ہیں، نامور موسیقاروں اور فلم سازوں کے ساتھ ان کے اشتراک نے ہندی سنیما کو بے شمار یادگار گانے دیے، جس سے وہ ایک دائمی ثقافتی علامت بن گئیں۔
حکومتِ ہند کی جانب سے ٓآشا بھوسلے کو موسیقی میں خدمات پر متعدد اعزازات سے نوازا گیا، جن میں دادا صاحب پھالکے ایوارڈ اور پدم بھوشن شامل ہیں۔
جبکہ 2011 میں گنیز ورلڈ ریکارڈ نے انہیں موسیقی کی تاریخ میں سب سے زیادہ گانے ریکارڈ کرنے والی فنکارہ قرار دیا۔
دوسری جانب آشا بھوسلے کے انتقال کی خبر پر غم کی لہر دوڑ گئی ہے، مداحوں، فنکاروں اور اہم شخصیات نے ان کی بے مثال خدمات کو خراجِ عقیدت پیش کیا ہے۔
خیال رہے کہ آشا بھوسلے موسیقی کی ملکہ لتا منگیشکر کی چھوٹی بہن تھیں۔ اگرچہ دنیا ان دونوں بہنوں کے درمیان ’مقابلے‘ کی کہانیاں سناتی رہی، لیکن آشا جی ہمیشہ کہتی تھیں کہ ”خون پانی سے گاڑھا ہوتا ہے۔