کینیڈا میں علی ظفر کا تاریخی کنسرٹ،  45 ہزار سے زائد افراد شریک

ویب ڈیسک:کینیڈا کے شہر مسی ساگا میں عالمی شہرت یافتہ پاکستانی گلوکار و اداکار علی ظفر نے اپنے "روشنی ٹور 2026" کے اختتامی شو میں شاندار پرفارمنس پیش کی۔

منتظمین کے مطابق سیلیبریشن اسکوائر میں ہونے والے اس اوپن ایئر کنسرٹ میں تقریباً 45 ہزار افراد نے شرکت کی، جسے اس مقام کی تاریخ کا سب سے بڑا میوزیکل ایونٹ قرار دیا جا رہا ہے۔

علی ظفر نے تقریباً دو گھنٹے تک اپنے مقبول گیت پیش کیے جن میں "چھنو"، "مستی"، "جھوم" اور "چل دل میرے" سمیت نئے البم "روشنی" کے گیت بھی شامل تھے۔ ان کی پرفارمنس پر ہزاروں شائقین جھوم اٹھے اور پورا اسکوائر موسیقی اور جوش و خروش سے گونجتا رہا۔

کنسرٹ کا سب سے یادگار لمحہ گیت "جھوم" کے دوران دیکھنے میں آیا جب ہزاروں مداحوں نے اپنے موبائل فونز کی روشنیاں جلا کر پورے علاقے کو روشنیوں کے سمندر میں تبدیل کر دیا۔

دوران کنسرٹ علی ظفر نے محبت، اتحاد، احترام اور ثقافتی شناخت کے فروغ پر زور دیتے ہوئے کہا کہ دنیا کے کسی بھی حصے میں رہتے ہوئے اپنی جڑوں اور ثقافت پر فخر کرنا چاہیے۔ انہوں نے خواتین کے حقوق، نوجوانوں کے خوابوں اور خاندانی اقدار کی اہمیت کو بھی اجاگر کیا۔

کنسرٹ کے اختتام پر شرکاء نے علی ظفر کے ساتھ مل کر ان کے مقبول گیت گائے اور اس یادگار شام کو پاکستانی موسیقی کے لیے ایک تاریخی لمحہ قرار دیا۔