مقبوضہ کشمیر میں یکطرفہ ،غیرقانونی بھارتی اقدامات کو 2سال مکمل ،وزیرخارجہ کاسلامتی کونسل کو خط

تفصیلات کے مطابق وزیر خارجہ شاہ محمود قریشی نے خط میں سلامتی کونسل کےصدر، سیکریٹری جنرل اقوام متحدہ کو مقبوضہ کشمیر کی بگڑتی صورتحال سےآگاہ کیا ہے۔شاہ محمود قریشی کی جانب سے لکھے گئے خط کے متن کے مطابق  بھارت نے مقبوضہ کشمیر میں اپنے غیرقانونی قبضےکو مستحکم بنانے کے لیے5 اگست 2019ء کو اقدامات کے، مقبوضہ خطےکی جغرافیائی اور انتخابی حدود میں رد و بدل کے لیے بھارت نے غیرقانونی اقدامات کیے ہیں، غیرقانونی بھارتی اقدامات کا مقصد مقبوضہ خطے میں کشمیریوں کو آزادی کےحق سے محروم کرنا ہے۔

شاہ محمود قریشی نے خط میں کہا ہے کہ بھارت غیرقانونی اقدامات سے کشمیریوں کو دبانا اور ان کے استصواب رائے کے حق کو چھیننا چاہتا ہے، 5 اگست 2019ء  اور اس کے تحت بھارت کے تمام غیر قانونی، یکطرفہ اقدامات کو مسترد کرتے ہیں۔

انہوں نے مزید کہا ہے کہ بھارت نے ان اقدامات سے عالمی قانون، اقوام متحدہ کی قراردادوں، چوتھے جنیوا کنونشن کی خلاف ورزی کی ہے، بھارت کے 5 اگست 2019ء کے تمام اقدامات قانون کی نظر میں قطعی غلط اور کالعدم ہیں، کشمیریوں کو کچلنے کے لیے 9لاکھ بھارتی فوج مقبوضہ خطے میں تعینات کی گئی ہے۔

وزیرخارجہ نے خط میں لکھا کہ بھارت نے 15ہزار سے زائد کشمیری نوجوانوں کو غیرقانونی طور پر قید کر رکھا ہے، مقبوضہ وادی میں ماورائے عدالت شہادتوں کا سلسلہ کئی گنا بڑھ چکا ہے، پرامن احتجاج کرنے والوں کے خلاف پیلٹ گنز سمیت ریاستی طاقت کا بہیمانہ استعمال معمول بن چکا ہے، مقبوضہ خطے میں لوگوں کے گھر مسمار اور تباہ کر کے کشمیریوں کو اجتماعی سزا دینا عام ہے۔وزیر خارجہ نے  مطالبہ کیا کہ بھارت 5 اگست 2019ء کے یک طرفہ اور غیرقانونی اقدامات واپس لے، مقبوضہ جموں وکشمیرمیں آبادی کے تناسب میں تبدیلی کے غیرقانونی اقدامات واپس لیے جائیں، مقبوضہ جموں و کشمیر میں انسانی حقوق کی خلاف ورزیاں فی الفور روکی جائیں اور  سلامتی کونسل بھارت سے ان اقدامات پر عمل درآمد کا مطالبہ کرے۔

لاہور میں حالیہ بم دھماکے سمیت تمام سرحدوں سے پاکستان کیخلاف بھارت کی دہشت گرد سرگرمیوں کی فعال منصوبہ بندی، فروغ اور مالی معاونت کا حوالہ دیتے ہوئے وزیر خارجہ نے سلامتی کونسل پر زور دیا کہ وہ مطالبہ کرے کہ بھارت پاکستان کیخلاف اپنی دہشت گردانہ مہم روک دے۔شاہ محمود قریشی نے سلامتی کونسل پر بھی زور دیا کہ کشمیریوں کو حق خود ارادیت دینے کی اپنی قراردادوں پر مکمل عملدرآمد یقینی بنانے کیلئے اپنی ذمہ داریاں پوری کرے۔