اسٹیج کے سینئر اداکار آصف اقبال انتقال کر گئے

عبدالسلام علی سے

لاہور: سینئر اسٹیج اداکار آصف اقبال انتقال کر گئے۔ اہل خانہ کے مطابق انہیں ہارٹ اٹیک ہوا جس کے بعد فوری طور پر اسپتال منتقل کیا گیا، تاہم وہ جانبر نہ ہوسکے۔

آصف اقبال کے بیٹے نے گفتگو کرتے ہوئے بتایا کہ والد کو اچانک دل کا دورہ پڑا، انہیں بروقت اسپتال پہنچایا گیا لیکن ان کی جان نہ بچائی جاسکی۔

آصف اقبال نے طویل عرصے تک اسٹیج ڈراموں سے وابستہ رہتے ہوئے لاتعداد ڈراموں میں اداکاری کے جوہر دکھائے۔ وہ بالخصوص کامیڈی میں اپنے منفرد انداز کے باعث ناظرین میں پہچانے جاتے تھے۔

ان کے انتقال کی خبر سے شوبز حلقوں میں سوگ کی فضا ہے، جبکہ ساتھی فنکاروں اور مداحوں کی جانب سے اظہارِ افسوس اور اہل خانہ سے تعزیت کا سلسلہ جاری ہے۔