وزیراعظم کے وژن کے مطابق ہم نے ڈیجٹل پاکستان کی جانب جانا ہے :امین ‏الحق‎ ‎

تفصیلات کے مطابق وزارت آئی ٹی اورٹیلی نارکے زیراہتمام نوشہرہ چارسدہ، صوابی، مردان میں براڈ بینڈ ‏سروس معاہدہ پراسلام آباد میں دستخط کی تقریب کا انعقاد کیا گیا ہے ۔

وفاقی وزیر آئی ٹی امین الحق کا تقریب سے خطاب کرتے ہوئے کہنا تھا کہ نوشہرہ صوابی مردان میں براڈ بینڈ سروس مہیا کرنے کے لیے 55 کروڑ سے زائد ‏لاگت آئی ہے،  ‎جبکہ ہم نے نوشہرہ صوابی مردان میں براڈ بینڈ سروس پراجیکٹ کو اگلے 16 مہینے میں مکمل ‏کرنا ہے ۔‎

ان کا کہنا تھا کہ براڈ بینڈ سروس سے کے پی کی آبادی کو فائدہ پہنچے گا، پنجاب، خیبر پختون خواہ، سندھ میں براڈ بینڈ سروسز مہیا کررہے ہیں، ‎ ‎جبکہ سندھ کی حکومت کی جانب سے وہ تعاون نہیں مل رہا ۔

ان کا مزید کہنا تھا کہ تمام ٹیلی فون کمپنیاں براڈ بینڈ پراجیکٹس کے معاملے میں خراج تحسین کی مستحق ہیں، ‏اس سال کے بجٹ میں ٹیلی کام سیکٹر کو انڈسٹری کا درجہ دیا گیا ہے ۔

وزیر دفاع پرویز خٹک کا خطاب کرتے ہوئے کہنا تھا کہ براڈ بینڈ سروس معاہدہ ایک بڑا قدم ہے تحریک انصاف کی حکومت نے ٹیکنالوجی کو آگے بڑھانے کی بہت کوشش کی ہے ،ہم پہلےہی دنیا سے بہت پیچھے رہ گئے ہیں، دنیا بہت آگے نکل گئی ہے ۔

ان کا مزید کہنا تھا کہ ٹیکنالوجی آج کل کی دنیا کی ضرورت ہے، ہمیں مستقبل سنوارنے کے لیے آئی ٹی میں آگے جانا ہے ۔