ملالہ یوسفزئی کا افغانستان کی صورتحال پر عالمی رہنماؤں سے فوری اقدامات اُٹھانے کامطالبہ

تفصیلات کے مطابق برطانوی نشریاتی ادارے کو انٹرویو  دیتے ہوئے 23 سالہ  ملالہ یوسفزئی نےافغانستان کی صورتحال پر گہری تشویش کا اظہار کیا ہے ۔ انہوں نے  امریکی صدر جوبائیڈن کو پیغام دیتے ہوئے کہا کہ انہیں افغان شہریوں کے لیے جرات مندانہ اقدامات کرنا ہوں گے، جبکہ وہ کئی عالمی رہنماؤں تک پہنچنے کی کوشش کر رہی ہیں۔ان کاکہنا تھا کہ   امریکی صدر جو بائیڈن کو افغان شہریوں خصوصاً خواتین کے حقوق کے تحفظ کے لیے بہت کچھ کرنا ہوگا۔

ہ ملالہ نے کہاکہ یہ درحقیقت ایک فوری انسانی بحران ہے  جس میں ہمیں جلد سے جلد اپنی مدد فراہم کرنے کی ضرورت ہے۔انہوں نے بتایا کہ ان کا افغانستان میں سماجی کارکنوں سمیت دیگر خواتین کے حقوق کے کارکنوں سے رابطہ ہوا جنہوں نے افغانستان میں آنے والے وقت پر تشویش کا اظہار کیا ہے۔

ملالہ یوسفزئی   نے پڑوسی ممالک سے افغان مہاجرین کے لیے اپنی سرحدیں کھولنے کا مطالبہ بھی کیا ہے۔

 اس حوالے سے گزشتہ روز ملالہ نے   ٹوئٹر پیغام بھی شئیر کیا تھا جس میں ان کاکہنا تھا کہ  وہ اب افغانستان میں خواتین، اقلیتوں اور انسانی حقوق کے سرکردہ علمبرداروں کے لیے فکر مند ہیں۔ ملالہ کے مطابق افغانستان میں شہریوں اور مہاجرین کے تحفظ فراہم کرتے ہوئے ان کے لیے فوری امداد کو یقینی بنانا چاہیے۔

یاد رہے کہ گزشتہ روز  طالبان نے افغانستا ن میں جنگ کے خاتمے کااعلان  کیا ہے ۔گزشتہ روز طالبان نے افغانستان کے دارالحکومت کا کنٹرول بھی سنبھال لیا ہے، طالبان نے صرف 10دنوں میں ہی تقریباً پورے ملک کا کنٹرول حاصل کرلیا۔ طالبان نے خوست کے ساتھ ساتھ دایکندی کے دارالحکومت نیلی کا کنٹرول بھی حاصل کیا، افغان صدر اشرف غنی ملک سے فرار ہوگئے اور طالبان صدارتی محل میں داخل ہوگئے تھے ۔