کابل دھماکے : حملہ آوروں کو ہرگز معاف نہیں کریں گے: امریکی صدر

تفصیلات کے مطابق واشنگٹن میں افغانستان کی صورتحال پر قوم سے خطاب کرتے ہوئے امریکی صدر آبدیدہ ہوگئے۔ انہوں نے کہا کہ ہم دہشتگردوں سے نہیں ڈریں گے،  مارے جانے والے ہمارے ہیرو ہیں۔ ہم یہ  حملہ بھولیں گے نہیں اور نہ معاف کریں گے ۔انہوں نے کہاکہ  آج جو زندگیاں کھو دیں وہ آزادی کی خدمت میں گئیں، ہم حملہ آوروں کا پیچھا کرکے ان کا شکار کریں گے۔

صدر جو بائیڈن نے کہا  کہ داعش کے دہشتگرد کامیاب نہیں ہوسکتے۔ کابل دھماکوں میں داعش اور طالبان کے درمیان گٹھ جوڑ کے کوئی شواہد نہیں ملے۔

 امریکی صدر نے کہاکہ  اپنے کمانڈرز کو حکم دیا ہے کہ حملے کیلئے آپریشنل پلان تیار کریں،  حملہ آوروں کی قیادت اور ان کے اثاثوں کو نشانہ بنانے کے احکامات دے دیئے، اگرافغانستان میں اضافی فوج کی ضرورت پڑی تو بھیجیں گے۔ جو بائیڈن نے مزید کہاکہ ہم مقرر وقت تک زیادہ  سے زیادہ امریکیوں کا انخلا ممکن بنائیں گے۔  افغانستان میں ہمارے کمانڈرانخلا کےمشن کی تکمیل کےلئےپرعزم ہیں ، انخلا کےمشن کوہرحال میں مکمل کریں گے۔

دوسری جانب افغانستان کے دارالحکومت کابل کے ایئر پورٹ پر گزشتہ روز ہونے والے 3 دھماکوں میں ہلاک ہونے والے افراد کی تعداد 90 ہو گئی، جبکہ 150 سے زائد افراد زخمی ہوئے ہیں۔ہلاک ہونے والوں میں 13 امریکی اہلکار بھی شامل ہیں، دھماکے سے مزید  اموات کا خدشہ ہے۔داعش نے کابل ایئر پورٹ دھماکوں کی ذمے داری قبول کر لی۔

امریکا، برطانیہ اور آسٹریلیا نے جمعرات کو اپنے شہریوں کو کابل ایئر پورٹ کے قریب جانے سے منع کیا تھا۔

ترجمان طالبان نے کابل ایئرپورٹ پر دھماکے کی مذمت کرتے ہوئے   علاقے کی سیکیورٹی امریکی فوج کے ہاتھ میں دی ۔

طالبان ترجمان ذبیح اللہ مجاہد نے دھماکوں کی شدید الفاظ میں مذمت کرتے ہوئے انسانی جانوں کے ضیاع پر دکھ کا اظہار کیا اور زخمیوں کی جلد صحتیابی کے لیے دعا کرتے ہوئے کہا کہ ذمہ داروں کو کیفر کردار تک پہنچایا جائے گا۔