پاکستانی تاریخ میں موجودہ حکومت نے ریکارڈ قرضے واپس کیے : وزیراعظم

 تفصیلات کے مطابق  اسلام آباد میں روشن  ڈیجیٹل اکاؤنٹ کے حوالے سے منعقدہ تقریب سے خطاب کرتے ہوئے وزیراعظم عمران خان نے کہا کہ ایکسپورٹ بڑھانے، روپے کو مستحکم رکھنے کی حکومتی کوششوں کی بدولت آج بہت بڑی تبدیلی آئی ہے، اور روپے کو مستحکم رکھنے میں اسٹیٹ بینک کے اس روشن ڈیجیٹل اکاؤنٹ نے اہم کردار ادا کیا جس پر گورنر اسٹیٹ بینک کو خراج تحسین پیش کرتا ہوں۔

وزیراعظم عمران خان نے کہاکہ  میں  بہت عرصے سے کوشش کر رہا تھا کسی طرح اوورسیز پاکستانیوں  کو منسلک  کریں،   جب ہم نے شوکت خانم شروع کیا تو احساس ہوا کہ ہمارا سب سے بڑا اثاثہ   بیرون ملک پاکستانی ہیں۔  انہوں نے کہاکہ جب  حکومت میں آئے تو ہمیں ریکارڈ خسارے کا سامنا تھا، کرنسی گرتی ہے تو سب سے زیادہ بوجھ غریب پر پڑتا ہے، کرنسی کی قدر کم ہونے سے مہنگائی میں اضافہ ہوتا ہے، جب تک روپیہ مضبوط نہیں ہوگا، معیشت مضبوط نہیں ہوگی، قرضے کے باوجود ہمارے معاشی اعشاریے مثبت ہیں، ڈھائی سال میں 20 ارب ڈالر قرض واپس کرچکے، ملک کی معیشت درست سمت کی طرف جا رہی ہے، 6 ہزار ارب روپے قرض کی مد میں دیئے، کسی حکومت نے اتنے قرضے واپس نہیں کیے، ہم ٹوٹل 6 ہزار ارب روپے قرضوں کی قسطیں دے چکے ہیں۔

وزیراعظم کا کہنا تھا کہ جب ڈالر کی قیمت 160 روپے تک پہنچی تو جتنی چیزیں باہر سے درآمد ہوتی تھیں مثلاً تیل مہنگا ہوگیا اور تیل کی وجہ سے ٹرانسپورٹ، بجلی مہنگی ہوئی جس کی وجہ سے مزید اشیا مہنگی ہوئیں۔ اسی طرح خوردنی تیل بھی ڈالر کی قدر میں اضافے کے باعث مہنگا ہوا اور کووِڈ کی وجہ سے بھی اس کی قیمتیں اوپر گئیں، اسی طرح دالیں جو ہم 70 فیصد درآمد کرتے ہیں وہ مہنگی ہوئی اس طرح سارا اثر عوام پر پڑا۔انہوں  نے کہا کہ عوام مشکل حالات سے گزرے، تنخواہ دار طبقے کو مشکلات کا سامنا رہا۔ کورونا کے دور میں ہماری برآمدات میں ریکارڈ اضافہ ہوا، آج ٹیکسٹائل فیکٹریوں کیلئے ورکرز نہیں مل رہے، پہلے لوگ ٹیکسٹائل سے ریئل اسٹیٹ میں جا رہے تھے،   بنگلادیش اور بھارت سے زیادہ تیزی سے ہماری ایکسپورٹس بڑھیں ، اب ملک میں ٹیکسٹائل کی صنعت تیزی سے فروغ پا رہی ہے۔  روپے کو مستحکم رکھنے کے لیے روشن ڈیجیٹل اکاؤنٹ اہم پیشرفت ہے۔ بہتر اقدامات سے اب ہماری ایکسپورٹ میں اضافہ ہو رہا ہے۔

وزیراعظم نے مزیدکہا کہ پاکستان میں کورونا وائرس کے باوجود معاشی استحکام رہا اور معاشی بہتری کے لیے بینکوں کا کردار اہم ہے تاہم بینکوں کو آسان قرضوں کی فراہمی پر کام کرنا چاہیے۔

اس سے قبل  گورنر سٹیٹ بینک رضا باقر کا کہنا تھا کہ 97 ممالک سے اوور سیز پاکستانیوں نے روشن ڈیجیٹل اکاؤنٹ کھلوائے، سٹیٹ بینک نے جو اقدامات کیے اس سے پہلے نہیں کیے گئے، روشن ڈیجیٹل اکاؤنٹس نے ترسیلات زر کیلئے 500 ملین ڈالر کا ٹارگٹ حاصل کرلیا، اوورسیز پاکستانیوں کو سرمایہ کاری کیلئے سہولتیں فراہم کر رہے ہیں، روشن ڈیجیٹل اکاؤنٹس کی تعداد میں روز بروز اضافہ ہو رہا ہے۔